استانا اكىمدىگى 42 ميلليارد تەڭگەنىڭ ينفراقۇرىلىمدىق جوباسى تۋرالى: بۇل - مەملەكەتتىك قۇپيا
استانا. KAZINFORM - استانا اكىمدىگى Kazinform ساۋالىنا جولداعان جاۋابىندا «ينتەرناتسيونالنىي» تۇرعىن الابىنداعى سۋ سورىپ، سۇزەتىن ءۇشىنشى ستانسانى سالۋعا جۇمسالعان 42 ميلليارد تەڭگەنىڭ قالاي يگەرىلگەنى تۋرالى ەگجەي-تەگجەيلى مالىمەت بەرۋدەن باس تارتتى.
بىلتىر جازدا استانا تۇرعىندارى سۋ تاپشىلىعىن قاتتى سەزىنىپ، «ينتەرناتسيونالنىي» تۇرعىن الابىنداعى ءۇشىنشى سورعى-سۇزگى ستانسا قولدانىسقا بەرىلگەن بولاتىن. كەيىن ول نىساندى ءماجىلىس دەپۋتاتتارى ارالاۋعا بارىپ، جوباعا «م گ ق ك قازقۇرىلىس سەرۆيس» ا ق باس مەردىگەر رەتىندە تارتىلعانى، 42 ميلليارد تەڭگە جۇمسالعانى ءمالىم بولعان. دەگەنمەن، مەملەكەتتىك ساتىپ الۋ پورتالىندا اتالعان جوبانىڭ كونكۋرس مالىمەتتەرىن تابۋ مۇمكىن ەمەس. سونىڭ سەبەبىن، جوبانىڭ تەحنيكالىق-ەكونوميكالىق نەگىزدەمەسى مەن سمەتالىق قۇجاتىن سۇراعان رەداكسيا ساۋالىنا اكىمدىك مىنانداي جاۋاپ بەردى:
«جوبا 2014-جىلى ازىرلەنگەن جانە جوبالاردىڭ مەملەكەتتىك ۆەدومستۆودان تىس ساراپتاماسىنىڭ وڭ قورىتىندىسىن العان «2023-جىلعا دەيىن سۋمەن جابدىقتاۋ جانە سۋ بۇرۋ جۇيەلەرىن دامىتۋ» بەكىتىلگەن تەحنيكالىق-ەكونوميكالىق نەگىزدەمەسى نەگىزىندە ازىرلەندى.
كورسەتىلگەن وبەكتىنىڭ قۇرىلىسى قولدانىستاعى زاڭناما نورمالارىنا سايكەس ازىرلەنگەن جانە بەكىتىلگەن جوبالىق-سمەتالىق قۇجاتتاماعا سايكەس جۇرگىزىلدى. جوبانىڭ قۇنىن «جوبالاردىڭ مەملەكەتتىك ۆەدومستۆودان تىس ساراپتاماسى» ر م ك- ءنىڭ اتتەستاتتالعان ساراپشىلارى راستادى.
جوبانى قارجىلاندىرۋ رەسپۋبليكالىق بيۋدجەتتىڭ قاراجاتتارى ەسەبىنەن جۇزەگە اسىرىلدى.
جوبانى ىسكە اسىرۋ شارتتارى قازاقستان رەسپۋبليكاسىنىڭ ساۋلەت، قالا قۇرىلىسى جانە قۇرىلىس سالاسىنداعى زاڭناماسىنىڭ تالاپتارىنا سايكەس كەلەدى. جوبانى ازىرلەۋشى - «سترويتەح- ماستەر» ج ش س، باس مەردىگەر - «ن گ س ك كازستروي سەرۆيس» ا ق جوبانىڭ قۇنى كوپتەگەن فاكتورلارعا تاۋەلدى.
…ولاردا مەملەكەتتىك قۇپيالارعا جاتاتىن مالىمەتتەردىڭ بولۋىنا بايلانىستى تەحنيكالىق- ەكونوميكالىق نەگىزدەمە مەن جوبالىق- سمەتالىق قۇجاتتامانى ۇسىنۋ مۇمكىن ەمەس»، - دەلىنگەن استانا قالاسى ەنەرگەتيكا باسقارماسىنىڭ جاۋابىندا.
اكىمدىك جوبانىڭ مەردىگەرى رەتىندە نەگە «م گ ق ك قازقۇرىلىس سەرۆيس» ا ق تاڭداپ الىنعانىن تۇسىندىرگەن.
«جوبانىڭ الەۋمەتتىك ماڭىزدىلىعىن، 2021-جىلى قارجىلاندىرۋدىڭ بولۋىنا قاراماستان ونى مۇمكىندىگىنشە تەزىرەك جۇزەگە اسىرۋ قاجەتتىلىگىن ەسكەرە وتىرىپ، قالا باسشىلىعى باس مەردىگەر رەتىندە تەحنيكالىق كۇردەلى جوبالاردى جۇزەگە اسىرۋدا تاجىريبەسى بار كومپانيانى جەتكىلىكتى ماتەريالدىق جانە قارجىلىق رەسۋرستارمەن قامتاماسىز ەتۋ تۋرالى شەشىم قابىلدادى.
«مەملەكەتتىك ساتىپ الۋ تۋرالى» قازاقستان رەسپۋبليكاسى زاڭىنىڭ 39-بابىنىڭ 3-تارماعىنىڭ 56-تارماقشاسىنا سايكەس مەردىگەر ۇيىم قازاقستان رەسپۋبليكاسى ۇكىمەتىنىڭ 2021-جىلعى 17- شىلدەدەگى 495- ق ب پ ءۇ (تاراتىلۋى شەكتەلگەن قىزمەتتىك اقپاراتتى قامتيتىن «قىزمەت بابىندا پايدالانۋعا ارنالعان» قۇجات - رەد.) قاۋلىسىمەن ايقىندالعان»، - دەپ جازىلعان جاۋاپتا.
