استانا اۋەجايىندا ۇشاقتاردىڭ زاقىمدانۋى: اۋە كەمەلەرى قانشالىقتى قاۋىپسىز

استانا. KAZINFORM - كەيىنگى كەزدەرى استانا اۋەجايىندا ۇشاقتاردىڭ زاقىمدانۋى وقيعالارى جيىلەپ كەتتى. قازىر وسى ۇشاقتارمەن ساپارلاۋ قانشالىقتى قاۋىپسىز؟ بۇل سۇراققا ق ر كولىك مينيسترلىگىندە وتكەن بريفينگىدە اۋە كومپانيالارىنىڭ وكىلدەرى جاۋاپ بەردى.

ەسكە سالساق، 1-تامىزدا SCAT كومپانياسى Boeing 737 ۇشاعىنىڭ فيۋزەلياجىنا زاقىم كەلدى، سونىڭ سالدارىنان اۋە كومپانياسى 20 رەيستىڭ كەستەسىن وزگەرتۋگە ءماجبۇر بولدى. 8-تامىزدا تاسىمالداۋشىنىڭ تاعى ءبىر ۇشاعى داۋىل مەن بۇرشاقتان زاقىمدانعان.

SCAT اۋە كومپانياسىنىڭ كوممەرتسيالىق ديرەكتورى نيكولاي بۋرياكوۆ ءبىر ۇشاق 3 كۇن، ال ەكىنشىسى 10 كۇن بويى تۇرىپ قالعانىن ايتتى.

«قازىر ۇشاقتاردىڭ بارلىعى جوندەلدى. ولار جولاۋشىلار تاسىمالداۋدا قاۋىپسىز دەپ ايتا الامىز. ۇشاقتارعا جاڭا بولشەكتەر سالىندى. قازىر ولار اۋە رەيستەرىن ورىنداپ جاتىر»، - دەدى ول.

سونىمەن قاتار، 5-تامىز كۇنى استانا اۋەجايىنىڭ وپەراتورى FlyArystan ۇشاقتارىنىڭ بىرىنەن اقاۋ شىعىپ، سالدارىنان ۇشاقتىڭ بىرنەشە كۇن بويى ءماجبۇرلى تۇراققا قويىلعانىن حابارلادى. اۋەجاي باسپالداقتارىن دۇرىس قولدانباۋدىڭ سالدارىنان ۇشاقتىڭ ارتقى كىرەبەرىس ەسىگى زاقىمدانعانى بەلگىلى بولدى.

كەيىننەن Air Astana اۋەكومپانياسى ءتورت ۇشاقتىڭ زاقىمدانعانىن، رەيستەر كەشىگەتىنىن مالىمدەدى.

بۇل رەتتە، Air Astana كومپانياسىنىڭ ۆيتسە-پرەزيدەنتى الەكساندر نەبوگا اۋە ساپارىنا شىعاتىن بارلىق ۇشاق تەحنيكالىق تەكسەرۋدەن وتكەنىن اتاپ ءوتتى.

«تەحنيكالىق تۇرعىدا كەمشىلىگى بار ەشبىر ۇشاق ۇشپايدى. سوندىقتان بۇرشاق سالدارىنان زاقىمدالعان ۇشاقتار قالپىنا كەلتىرىلدى، بارلىعى اۋە رەيستەرىن ورىنداپ جاتىر. كەيبىرەۋلەرى 2 كۇن، ال قالعاندارى 4 كۇن جوندەلدى. وسىنىڭ وزىندە كەيبىر قيىندىقتار بولدى، ياعني رەيستەر كەشىكتى. اتاپ ايتقاندا، قاۋىپسىزدىك ماسەلەسىن ءبىرىنشى ورىنعا قويىپ وتىرمىز»، - دەدى كومپانيا وكىلى.

بۇدان بۇرىن حابارلانعانداي، ق ر كولىك ۆيتسە-ءمينيسترى تالعات لاستايەۆ جاز ايلارىندا رەيستەردىڭ كەشىگۋى دەرەكتەرىنە قاتىستى تۇسىنىك بەردى.