Astana AI Film Festival فيناليستەرى فەستيۆال تۋرالى اسەرلەرىمەن ءبولىستى
استانا. KAZINFORM - استانادا وتكەن العاشقى حالىقارالىق جاساندى ينتەللەكت فەستيۆالى - AAIFF 2026 فيناليستەرى شارادان العان اسەرلەرىن ايتىپ، فەستيۆالگە تاعى دا قاتىسۋعا نيەتتى ەكەنىن جەتكىزدى، دەپ حابارلايدى Kazinform ءتىلشىسى.
ارگەنتينادان كەلگەن AAIFF فيناليسى گابريەل بوسيزيو (Gabriel Bosisio) ستوريتەللينگتىڭ مادەني الەۋەتى مەن وقيعالاردىڭ ادامداردى شەكارالارعا قاراماستان بىرىكتىرە الاتىنىن اتاپ ءوتتى. ونىڭ ايتۋىنشا، ءوزى كومپيۋتەر كومەگىمەن جاساعان جۇمىستىڭ استانا جاستارىنىڭ كوڭىلىنەن شىققانىن كورۋ ەرەكشە اسەر قالدىرعان.
- جاساندى ينتەللەكت ستوريتەللينگ ارقىلى كوپتەگەن كەدەرگىنى جويۋعا قابىلەتتى،- دەدى ول.
ارگەنتينالىق فيناليست جاساندى ينتەللەكتتىڭ دامۋىن كينوكامەرانىڭ پايدا بولۋىمەن سالىستىرىپ، ونى كينەماتوگرافيانىڭ بولاشاعىنا كۇتپەگەن وزگەرىستەر اكەلۋى مۇمكىن جاڭا تەحنولوگيا دەپ اتادى.
ال وڭتۇستىك كورەيادان كەلگەن Astana AI Film Festival فيناليسى كان دەحەن (Kang Daehyeong) باستاپقىدا ءوز يدەياسىن قاتىسۋشىلار سانى كوپ بايقاۋدان وتكىزە الاتىنىنا كۇماندانعانىن ايتتى. سوندىقتان فينالعا شىعۋى ول ءۇشىن كۇتپەگەن جاعداي ءارى ۇلكەن مارتەبە بولعان.
- العاش رەت ءوتىنىم بەرىپ، تىركەلگەن كەزدە قاتىسۋشىلاردىڭ سانىن كورىپ، «مەنىڭ دە قولىمنان كەلە مە؟» دەپ ويلادىم. بولاشاقتا قايتادان فەستيۆالگە قاتىسۋ ءۇشىن وسىندا كەلۋگە مۇمكىندىك بولسا، بۇل كەرەمەت بولار ەدى. ەگەر كەلەسى ماۋسىم وتسە، مىندەتتى تۇردە تاعى دا ءوتىنىم بەرەمىن، - دەدى كان دەحەن.
ول الداعى فەستيۆالدەردە كينودا جاساندى ينتەللەكتىنى قولدانۋ ارقىلى اشىلاتىن مۇمكىندىكتەردى ءارى قاراي زەرتتەي بەرۋگە ءۇمىت ءبىلدىردى.
ەسكە سالايىق، مەملەكەت باسشىسى Astana AI Film Festival جاساندى ينتەللەكت قولدانعان فيلمدەردىڭ ءبىرىنشى حالىقارالىق بايقاۋىندا ءسوز سويلەپ، اتالعان فەستيۆالدىڭ ەرەكشەلىگىن اتاپ ءوتتى.
استانادا Astana AI Film Festival (AAIFF 2026) اياقتالدى. جاساندى ينتەللەكت كومەگىمەن جاسالعان فيلمدەر فەستيۆالى 1-3 قازان ارالىعىندا ءوتتى. بيىل بايقاۋعا الەمنىڭ 125 ەلىنەن 8067 ءوتىنىم ءتۇسىپ، ولاردىڭ اراسىنان 25 جۇمىس فينالعا ءوتتى.
فەستيۆالدىڭ جالپى جۇلدە قورى 2 ميلليون دوللاردى قۇرادى. ونىڭ جارتىسى جۇلدەگە، قالعان بولىگى پەرسپەكتيۆالى AI كوماندالاردى قولداۋعا جانە قازاقستانداعى ءوندىرىستى دامىتۋعا باعىتتالدى.
قازاقستاندىق اۆتور مىرزاحان جۇماحان Astana AI Film Festival فەستيۆالىندە «ۇزدىك كەيىپكەر» نوميناتسياسىندا جەڭىسكە جەتتى. حالىقارالىق قازىلار القاسى ونىڭ «it Was Just a Joke» («بۇل جاي عانا ءازىل ەدى» ) كومەدياسىن جوعارى باعالادى.
Astana AI Film Festival جەڭىمپازدارىنىڭ ءبىرى يتاليالىق اۆتور ياكوپو رەالە ءوزىنىڭ جەتىستىك جولى جايىندا ايتىپ بەردى.
ال Astana AI Film Festival جەڭىمپازى نيكولاي شەستاكتىڭ (لاتۆيا) استاناداعى حالىقارالىق كينوفەستيۆالى ءوزىنىڭ ونەرىن بارشا الەمگە تانىتۋعا مۇمكىندىك بەرگەنىن ايتتى.
