استانانىڭ ۇستىنەن 15-مامىردا جويعىش ۇشاق ۇشىپ وتەدى - مينيسترلىك سەبەبىن ءتۇسىندىردى
استانا. KAZINFORM - استانادا 15-مامىر كۇنى ق ر قارۋلى كۇشتەرى اۋە قورعانىسى كۇشتەرىنىڭ جوسپارلى ءىس-شارالارى اياسىندا قالا ۇستىندە جويعىش ۇشاقتاردىڭ دەمونستراتسيالىق ۇشۋى وتەدى، دەپ حابارلايدى قورعانىس مينيسترلىگىنىڭ باسپا ءسوز قىزمەتى.
ۆەدومستۆو مالىمەتىنشە، ءىس-شاراعا دايىندىققا بايلانىستى 10-مامىردان باستاپ ەلوردا اۋە كەڭىستىگىندە اسكەري اۆياتسيانىڭ جاتتىعۋ ۇشۋلارى باستالادى.
- جويعىش ۇشاقتاردىڭ ۇشۋى مەن جاتتىعۋ ءىس-شارالارى قاۋىپسىز بيىكتىكتە جۇزەگە اسىرىلادى جانە قالا تۇرعىندارىنىڭ كۇندەلىكتى تىنىس-تىرشىلىگىنە كەدەرگى كەلتىرمەيدى. ەلوردا تۇرعىندارى مەن قوناقتارىنان جاتتىعۋلار مەن دەمونستراتسيالىق ۇشۋ كەزەڭىندە تۋىنداۋى مۇمكىن قىسقا مەرزىمدى شۋ دەڭگەيىنىڭ ارتۋىنا تۇسىنىستىكپەن قاراۋدى سۇرايمىز، - دەلىنگەن حابارلامادا.
سونىمەن قاتار، قورعانىس مينيسترلىگى بارلىق ۇشۋلار قاۋىپسىزدىك تالاپتارىنا قاتاڭ سايكەس ۇيىمداستىرىلادى جانە حالىققا ەشقانداي قاۋىپ توندىرمەيتىنىن العا تارتتى.
- ءتۇرلى ءتۇستى تۇتىندەردى پايدالانۋ تەك دەمونستراتسيالىق سيپاتقا يە جانە قورشاعان ورتاعا زياندى اسەر ەتپەيدى، - دەپ سەندىردى مينيسترلىك.
بۇعان دەيىن قورعانىس مينيسترلىگى اسكەري قىزمەتشىلەردىڭ تولەم ءتارتىبىن جاڭارتقانىن جازعانبىز.
