استانالىقتار تومەن پايىزبەن باسپانا الا الادى: قۇجاتتى قايدا تاپسىرۋ قاجەت؟

استانادا 2023-2029 -جىلدارعا ارنالعان تۇرعىن ءۇي- كوممۋنالدىق ينفراقۇرىلىمدى دامىتۋ تۇجىرىمداماسى اياسىندا كرەديتتىك تۇرعىن ءۇيدى ءبولۋ بويىنشا جاڭا كەزەڭ باستالادى. بۇل جولى ا91 كوشەسىندەگى №36، 36/1، 36/2 جانە 36/3 تۇرعىن ۇيلەردەن 562 پاتەردى ىسكە اسىرۋ جوسپارلانعان.

ءوتىنىش قابىلداۋ بۇگىن باستالدى. ازاماتتار ءوتىنىمدى BaSpana Market پلاتفورماسىنداعى جەكە كابينەتى ارقىلى بەرە الادى.

پاتەردىڭ شارشى مەترى قانشا تۇرادى؟

تۇرعىن ءۇيدىڭ ءبىر شارشى مەترىنىڭ باعاسى 332916 تەڭگە بولىپ بەلگىلەنگەن.

باعدارلاما اياسىندا 166 ءبىر بولمەلى، 276 ەكى بولمەلى، 80 ءۇش بولمەلى جانە 40 ءتورت بولمەلى پاتەر ۇسىنىلادى.

پاتەرلەر تازا ارلەۋمەن بەرىلەدى. ياعني تۇرعىن ءۇيدى بەتون قابىرعادان باستاپ قايتا جوندەۋدىڭ قاجەتى جوق.

مىسالى، ەكى بولمەلى پاتەردىڭ اۋدانى شامامەن 62 شارشى مەتر بولسا، ونىڭ قۇنى 20,6 ميلليون تەڭگەنى قۇرايدى.

يپوتەكا ەرەجەسى قانداي؟

پاتەرلەردى جىلدىق 5 پايىز مولشەرلەمەمەن جەڭىلدەتىلگەن نەسيە ارقىلى ساتىپ الۋعا بولادى. نەسيەنىڭ جىلدىق ءتيىمدى سىياقى مولشەرلەمەسى 5,2 پايىزدان 5,8 پايىزعا دەيىن.

باستاپقى جارنا - كەمىندە 10 پايىز. نەسيە مەرزىمى - 20 جىلعا دەيىن. بۇل شارتتار تۇجىرىمداما اياسىنداعى «5-10-20» باعىتىنىڭ قولدانىستاعى تالاپتارىنا سايكەس كەلەدى.

مىسالى، قۇنى 20,6 ميلليون تەڭگە بولاتىن پاتەردى الايىق. ەگەر باستاپقى جارنا رەتىندە 10 پايىز، ياعني شامامەن 2,06 ميلليون تەڭگە تولەنسە، نەسيە سوماسى شامامەن 18,5 ميلليون تەڭگە بولادى.

5 پايىز مولشەرلەمەمەن 20 جىلعا الىنعان نەسيە بويىنشا اننۋيتەتتىك تولەم ايىنا شامامەن 122 مىڭ تەڭگەنى قۇرايدى. ناقتى تولەم پاتەردىڭ قۇنىنا، نەسيە سوماسىنا جانە شارت تالاپتارىنا بايلانىستى بولادى.

باعدارلاماعا كىمدەر قاتىسا الادى؟

بۇل باعدارلاما 5 پايىزدىق يپوتەكامەن باسپانا العىسى كەلەتىن بارلىق ازاماتقا ارنالماعان. بايقاۋعا تۇرعىن ۇيگە مۇقتاج رەتىندە كەزەكتە تۇرعان ازاماتتار قاتىسا الادى.

سونىمەن قاتار «5-10-20» باعىتى بويىنشا تابىسقا قاتىستى تالاپ بار. سوڭعى التى ايداعى وتباسىنىڭ ەڭبەك جانە/نەمەسە كاسىپكەرلىك قىزمەتتەن تۇسەتىن جيىنتىق تابىسى وتباسىنىڭ ءاربىر مۇشەسىنە شاققاندا 6 ەڭ تومەنگى كۇنكورىس دەڭگەيىنەن اسپاۋى ءتيىس.

«وتباسى بانك» مالىمەتىنشە، باعدارلاما بويىنشا بايقاۋ تەك اكىمدىكتە تۇرعىن ءۇي كەزەگىندە تۇرعان ازاماتتار اراسىندا وتكىزىلەدى.