استانالىق 10-سىنىپ وقۋشى Earth Ambassadors حالىقارالىق جاستار قوزعالىسىنىڭ پرەزيدەنتى اتاندى
استانا. KAZINFORM - استاناداعى 71-مەكتەپ-ليتسەيىنىڭ 10-سىنىپ وقۋشىسى ايگەرىم جيەنبەك سوڭعى ەكى جىل بويى ەكولوگيا، جاستار ديپلوماتياسى، حالىقارالىق ىنتىماقتاستىق جانە ءبىلىم بەرۋ سالالارىنداعى جوبالارعا بەلسەندى قاتىسىپ كەلەدى، دەپ حابارلايدى ەلوردا اكىمدىگىنىڭ رەسمي سايتى.
جاقىندا ول Earth Ambassadors («جەر امباسسادورلارى») حالىقارالىق جاستار قوزعالىسىنىڭ پرەزيدەنتى اتاندى.
ايگەرىم قوعامدىق قىزمەتىن سەگىزىنشى سىنىپتا باستاعان. العاشىندا ءتۇرلى ءىس-شارالاردى ۇيىمداستىرۋعا كومەكتەسىپ، كەيىن قوزعالىستىڭ حالىقارالىق قاتىناستار ءبولىمىنىڭ ۇيلەستىرۋشىسى بولعان. وسى كەزەڭدە وقۋشى ەستونيا، بىرىككەن اراب امىرلىكتەرى جانە برازيليا ەلشىلىكتەرىمەن بايلانىستى ءىس-شارالارعا قاتىسىپ، حالىقارالىق ىنتىماقتاستىقتى دامىتۋعا ۇلەس قوسقان.
سونىمەن قاتار ايگەرىم پورتۋگال ءتىلى مەن مادەنيەتىن دارىپتەۋ ماقساتىندا ءتىل كلۋبىن قۇرعان. سونداي-اق گەندەرلىك تەڭدىك پەن ايەلدەر قۇقىعىن قورعاۋعا ارنالعان جەكە ءىس-شارا ۇيىمداستىرعان.
- وقۋشىنىڭ ەكولوگيا سالاسىندا دا جەتىستىكتەرى بار. ايگەرىم Pro Eco رەسپۋبليكالىق بايقاۋىندا ەكىنشى ورىن الىپ، ءوز جوباسىن قازاقستاننىڭ ەكولوگيا مينيسترىنە تانىستىرعان. بۇدان بولەك، «تازا قازاقستان» باستاماسى اياسىندا اعاش وتىرعىزۋ ءىس-شارالارىنا، سونداي-اق ديپلوماتيالىق وكىلدىكتەرمەن، حالىقارالىق ۇيىمدارمەن جانە بيزنەس وكىلدەرىمەن بىرلەسكەن ەكولوگيالىق جوبالارعا قاتىسقان، - دەلىنگەن حابارلامادا.
قىركۇيەك ايىندا ايگەرىم قوزعالىستىڭ پرەزيدەنتى بولىپ تاعايىندالدى. قازىر جاس كوشباسشى جاستار باستامالارىن قولداۋعا، حالىقارالىق بايلانىستاردى نىعايتۋعا جانە ەكولوگيالىق مادەنيەتتى دامىتۋعا ەرەكشە كوڭىل ءبولىپ ءجۇر.
ايگەرىمنىڭ تاجىريبەسى وقۋشىلاردىڭ مەكتەپ قابىرعاسىندا ءجۇرىپ-اق قوعامدىق باستامالارعا بەلسەندى قاتىسىپ، حالىقارالىق ىنتىماقتاستىق پەن تۇراقتى دامۋعا ۇلەس قوسا الاتىنىن كورسەتىپ وتىر.
بۇعان دەيىن نوبەل لاۋرەاتتارىنىڭ قولتاڭباسى بار تەلەسكوپ استانالىق وقۋشىلارعا سىيعا بەرىلگەنىن جازعانبىز.
