استاناعا ءۇش وبلىستان 400 توننادان استام اۋىل شارۋاشىلىعى ءونىمى جەتكىزىلدى
استانا. KAZINFORM - استانادا ماڭعىستاۋ، الماتى جانە اباي وبلىستارى تاۋار وندىرۋشىلەرىنىڭ قاتىسۋىمەن كەزەكتى اۋىل شارۋاشىلىعى جارمەڭكەسى ءوتىپ جاتىر.
تۇرعىندارعا فەرمەرلەردەن تىكەلەي جەتكىزىلگەن ەت، بالىق، ءسۇت جانە ازىق- تۇلىك ونىمدەرىنىڭ ءتۇر-ءتۇرى ۇسىنىلىپ وتىر. بۇل ازىق-تۇلىكتىڭ قولجەتىمدىلىگىن ارتتىرىپ قانا قويماي، وتاندىق وندىرۋشىلەردى قولداۋعا مۇمكىندىك بەردى.
اتاپ ايتقاندا، ءۇش ءوڭىردىڭ اۋىل شارۋاشىلىعى تاۋارىن وندىرۋشىلەرى استاناعا 400 توننادان استام ءونىم اكەلدى.
ونىڭ ىشىندە 170 توننا كوكونىس پەن جەمىس-جيدەك، 100 توننا ەت جانە ەت ونىمدەرى، 40 توننا بال، 25 توننا ءسۇت ونىمدەرى، 17 توننا باقشا ءونىمى، 10 توننا بالىق جانە 40 توننادان استام باسقا دا ازىق- تۇلىك بار.
- بۇل جارمەڭكە باستالعالى تۇراقتى كەلىپ تۇرامىن. سەبەبى جارمەڭكە تەك قولجەتىمدى باعاعا ازىق- تۇلىك الۋ مۇمكىندىگى عانا بەرىپ قويماي، ساپاسى جوعارى، ءار ءوڭىردىڭ وزىنە ءتان ەرەكشە ونىمدەرىن الۋعا سەپتىك ەتەدى.
ماسەلەن، وتكەن اپتادا قىزىلوردانىڭ كۇرىشى مەن تارى-تالقانى، قاۋىندارى ءۇشىن كەلسەم، وسى جولى ماڭعىستاۋدىڭ شۇباتى، قىزىل بالىعى، سەمەيدىڭ شي باۋىرساعى مەن سارجال قىمىزى، الماتىنىڭ اپورتى ءۇشىن كەلدىم. جالپى جارمەڭكە حالىققا ەرەكشە ءبىر مەرەكەلىك كوڭىل-كۇي سىيلايدى. تولتىرىپ ءبارىن الا بەرۋ مىندەت ەمەس، ءوڭىردىڭ وزىنە ءتان ەرەكشە ونىمدەرىنەن ءدام تاتۋ سول ولكەگە بارىپ كەلگەندەي اسەر سىيلاۋى ماڭىزدى، - دەيدى ەلوردالىق ايگۇل قۇلدانايەۆا.
اباي وبلىسى اۋىل شارۋاشىلىعى باسقارماسىنىڭ مالىمەتى بويىنشا وڭىردەن ەلورداعا 200 توننادان استام اۋىل شارۋاشىلىعى ءونىمى جەتكىزىلدى. جارمەڭكەگە وبلىستىڭ ءار وڭىرىنەن كەلگەن شارۋا قوجالىقتارى مەن كاسىپكەرلەر قاتىسىپ، ءوز ونىمدەرىن ۇسىنىپ وتىر.
جارمەڭكە اياسىندا بۇل وڭىردەن 50 تونناعا جۋىق ەت، 70 توننا بال، 30 توننا كوكونىس، 30 توننا قاربىز، سونداي-اق ءسۇت جانە شۇجىق ونىمدەرى، قىمىز، ۇلتتىق تاعامدار مەن باسقا دا اۋىل شارۋاشىلىعى ونىمدەرى كەڭ اسسورتيمەنتى ۇسىنىلۋدا.
ەڭ باستىسى، بارلىق ءونىم جەرگىلىكتى اۋىل شارۋاشىلىعى تاۋارىن وندىرۋشىلەردەن تىكەلەي جەتكىزىلدى. بۇل دەلدالدار سانىن ازايتىپ، ونىمدەردى تۇتىنۋشىلارعا قولجەتىمدى باعامەن ۇسىنۋعا مۇمكىندىك بەرەدى.
باستى ماقسات - اباي وبلىسىنىڭ ساپالى ءارى تابيعي ونىمدەرىن ەلوردا تۇرعىندارىنا تانىستىرۋ، جەرگىلىكتى وندىرۋشىلەردى قولداۋ جانە ءوڭىرارالىق ساۋدا بايلانىستارىن نىعايتۋ.
جارمەڭكە «قازانات» يپپودرومىنىڭ اۆتوتۇراعىندا، قارقارالى تاسجولى، 1 مەكەنجايىندا وتۋدە. سونداي- اق جارمەڭكە كەزىندە ەلوردا تۇرعىندارى مەن قوناقتارىنا ىڭعايلى بولۋ ءۇشىن اتالعان ورىنعا № 18، 37 جانە 303 اۆتوبۋس باعىتتارى قاتىناۋدا. جارمەڭكە ساعات 09:00 دەن 18:00 گە دەيىن جۇمىس ىستەيدى.
