استاناداعى بالاباقشادا بالاعا قول كوتەرگەن قىزمەتكەر پوليتسياعا جەتكىزىلدى
استانا. KAZINFORM - استاناداعى تۇزەتۋ بالاباقشالارىنىڭ بىرىندە تاربيەشىنىڭ كومەكشىسى بالانى بىرنەشە رەت ۇرعان. وقيعا تۇسىرىلگەن ۆيدەو الەۋمەتتىك جەلىدە تاراپ، جۇرتتىڭ نارازىلىعىن تۋدىردى، دەپ حابارلايدى ult.kz.
كادرلاردان بالانىڭ جىلاعانى، ال باسقا بالالاردىڭ قورقىپ تۇرعانى بايقالادى. جەلى قولدانۋشىلارى بالاباقشالارداعى باقىلاۋدى كۇشەيتىپ، بالالاردىڭ قاۋىپسىزدىگىن قامتاماسىز ەتۋدى تالاپ ەتتى.
استانا قالالىق پوليتسيا دەپارتامەنتىنىڭ مالىمەتىنشە، ۆيدەو 2024 -جىلعى قازاندا تۇسىرىلگەن. بالاباقشادا تاربيەشىنىڭ كومەكشىسى بولىپ جۇمىس ىستەگەن ايەلدىڭ جەكە باسى انىقتالىپ، ول پوليتسيا باسقارماسىنا جەتكىزىلگەن. سونداي-اق زارداپ شەككەن بالالاردىڭ اتا-انالارى انىقتالعان.
قازىر وقيعانىڭ ءمان-جايىن جان-جاقتى انىقتاۋعا باعىتتالعان تەرگەۋ ارەكەتتەرى جۇرگىزىلىپ جاتىر.
ايتا كەتەيىك، بۇعان دەيىن اقتوبە وبلىسىنىڭ بەگىمبەت اۋىلىنداعى بالاباقشادا تاربيەشىنىڭ كومەكشىسى ۇيىقتاپ جاتقان ءبىر جارىم جاسار ءسابيدىڭ بەتىن تىرناپ العانى حابارلانعان ەدى. وسى جاعدايدان كەيىن ارنايى كوميسسيا قۇرىلىپ، تەكسەرۋ باستالعان جانە سوت- مەديتسينالىق ساراپتاما تاعايىندالعان.
