استاناداعى الەم چەمپيوناتىنا جۇزدەن استام ەلدەن 1000 نان استام بالۋان كەلەدى

بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز بريفينگىندە ق ر تۋريزم جانە سپورت ۆيتسە-ءمينيسترى سەرىك جاراسبايەۆ ءمالىم ەتتى.

- كۇرەس تۇرلەرىنەن ەرەسەكتەر اراسىنداعى الەم چەمپيوناتى 2026-جىلعى 24-قازان مەن 1-قاراشا ارالىعىندا استاناداعى Barys Arena سپورت كەشەنىندە وتەدى. بيىل بۇل جارىسقا الەمنىڭ جۇزدەن استام ەلىنەن مىڭعا جۋىق سپورتشى الەم چەمپيونى اتاعى ءۇشىن باق سىنايدى. اتاپ ايتقاندا گرەك-ريم كۇرەسى بويىنشا 10 سالماق دارەجەسىندە، ايەلدەر كۇرەسى بويىنشا 10 سالماق دارەجەسىندە جانە ەركىن كۇرەس بويىنشا 10 سالماق دارەجەسىندە بالۋاندار بەلدەسەدى، - دەدى سەرىك جاراسبايەۆ.

ۆيتسە-ءمينيستردىڭ ايتۋىنشا، قازاقستاننىڭ الەمدىك دەڭگەيدەگى ءىرى سپورتتىق جارىستى قابىلداۋى ەلدىڭ سپورتتىق الەۋەتىن كوتەرەدى.

- مۇنداي ءىرى سپورتتىق شارانى وتكىزۋ، ەڭ الدىمەن، ەلىمىزدىڭ سپورتتىق الەۋەتىن، سونداي-اق حالىقارالىق دەڭگەيدەگى جارىستاردى ۇيىمداستىرۋ مۇمكىندىگىن كورسەتەدى. بۇل شەشىم مامىر ايىندا قابىلدانىپ، ءبىز استانادا كۇرەس تۇرلەرىنەن الەم چەمپيوناتىن وتكىزۋ قۇقىعىنا يە بولدىق، - دەدى ول.

قازىرگى ۋاقىتتا چەمپيوناتتى وتكىزۋگە دايىندىق بىرنەشە باعىت بويىنشا جۇرگىزىلىپ جاتىر. مينيسترلىك، قازاقستان كۇرەس فەدەراتسياسى جانە استانا قالاسىنىڭ اكىمدىگى بىرلەسىپ جۇمىس جوسپارىن ازىرلەپ، ۇيىمداستىرۋ كوميتەتىن بەكىتكەن.

- UWW- نىڭ تەحنيكالىق دەلەگاتسياسى استاناعا كەلىپ، سپورت نىساندارىنىڭ دايىندىعىنا جانە ولاردىڭ مۇمكىندىگىنە ءوز باعاسىن بەردى. قازىر بارلىق باعىت بويىنشا اۋقىمدى جۇمىس جۇرگىزىلىپ جاتىر، - دەدى ۆيتسە-مينيستر.

ونىڭ ايتۋىنشا، باستى نازار سپورت نىساندارىنىڭ حالىقارالىق تالاپتارعا سايكەستىگىنە، سپورتشىلار مەن كورەرمەندەرگە قولايلى جاعداي جاساۋعا جانە جارىس وتەتىن الاڭداردىڭ تولىق دايىندىعىن قامتاماسىز ەتۋگە اۋدارىلىپ وتىر.

ەسكە سالا كەتەيىك، استانا ەرەسەكتەر اراسىنداعى كۇرەس تۇرلەرىنەن الەم چەمپيوناتىن جەتى جىلدان كەيىن قايتا قابىلدايدى. بۇعان دەيىن ەلوردادا الەمدىك دودا 2019-جىلى وتكەن بولاتىن.