استانادا ەت جارمەڭكەسىندە مىڭ توننادان استام ەت ءونىمى ۇسىنىلادى

جارمەڭكە اياسىندا 1000 توننادان استام ەت ءونىمىن ساتۋ جوسپارلانىپ وتىر. سوعىم - قازاق حالقىنىڭ قىسقا دايىندىقپەن بايلانىستى ەجەلدەن كەلە جاتقان داستۇرلەرىنىڭ ءبىرى.

اتا-بابامىز ەتىن قامداپ، وتباسىمەن داستارقان باسىنا جينالىپ، جاقىندارىمەن ءدام بولىسكەن. بۇگىندە «سوعىم- FEST» وسى ءداستۇردى زاماناۋي فورماتتا جالعاستىرىپ، وتاندىق فەرمەرلەر مەن ەلوردا تۇرعىندارىن ءبىر الاڭدا توعىستىرادى.

جارمەڭكە قالا تۇرعىندارىنا ەت ونىمدەرىن تىكەلەي وندىرۋشىلەردەن ساتىپ الۋعا، قىسقى ماۋسىمعا قاجەتتى ازىق- تۇلىك قورىن دايىنداۋعا جانە وتاندىق اۋىل شارۋاشىلىعى تاۋار وندىرۋشىلەرىن قولداۋعا مۇمكىندىك بەرەدى.

جارمەڭكەلەر ءار دەمالىس كۇندەرى ساعات 09:00-دەن 19:00-گە دەيىن قالانىڭ ءۇش الاڭىندا وتەدى:

• «Keruen Joly» ساۋدا ورتالىعى - الاش تاسجولى، 35ب؛

• «ەت الەمى» ساۋدا ورتالىعى - الاش تاسجولى، 31/1؛

• «Jurt» ساۋدا ورتالىعى - بەيبارىس سۇلتان كوشەسى، 3.

جارمەڭكە وتەتىن ورىندارعا قوعامدىق كولىكپەن جەتۋگە بولادى.

«Keruen Joly» جانە «ەت الەمى» ساۋدا ورتالىقتارىنا №7، 11، 39، 41، 45، 53، 59، 76، 81، 82، 120، 120ا، 307 جانە 317 اۆتوبۋس باعىتتارى قاتىنايدى.

«Jurt» ساۋدا ورتالىعىنا №2، 7، 13، 32، 42، 49، 50، 67 جانە 73 اۆتوبۋس باعىتتارى ارقىلى بارۋعا بولادى.