استانادا سەگىز جولاقتى جاڭا كوپىر سالىنباق

بۇل تۋرالى ەلوردانىڭ كولىك جانە جول-كولىك ينفراقۇرىلىمىن دامىتۋ باسقارماسى مالىمدەدى.

- استانا قالاسىنىڭ باس جوسپارىنا سايكەس، حۋسەين بەن تالال كوشەسىن ءال-فارابي داڭعىلىنان ءشامشى قالداياقوۆ كوشەسىنە دەيىن جالعاستىرۋ كوزدەلگەن. كوشە ەسىل وزەنىمەن توعىساتىن تۇستا اۆتوكولىك كوپىرى سالىنادى، - دەلىنگەن باسقارما حابارلاماسىندا.

جاڭا جول سول جانە وڭ جاعالاۋدى بايلانىستىراتىن تاعى ءبىر كولىك باعىتىنا اينالادى. وسىلايشا، قالاداعى كولىك كوپ جۇرەتىن نەگىزگى كوشەلەرگە تۇسەتىن جۇكتەمەنى ازايتۋ كوزدەلىپ وتىر.

اتاپ ايتقاندا:

- سىعاناق كوشەسى مەن ۇلى دالا داڭعىلىنداعى كولىك قوزعالىسى ازايادى. «نۇرلى جول» ۆوكزالى نەمەسە الماتى اۋدانىنا قاراي جۇرەتىن جۇرگىزۋشىلەر حۋسەين بەن تالال كوشەسى ارقىلى جۇرە الادى؛

- سول جاعالاۋداعى نەگىزگى جولداردىڭ ءبىرى - ماڭگىلىك ەل داڭعىلىنداعى كولىك قوزعالىسى دا ازايادى. ويتكەنى كولىكتەردىڭ ءبىر بولىگى جاڭا باعىتقا اۋىسادى؛

- سىعاناق كوشەسىندەگى ەسىل وزەنى ارقىلى وتەتىن «ارىس» كوپىرى مەن تاۋەلسىزدىك داڭعىلىنداعى كوپىرگە تۇسەتىن جۇكتەمە ازايادى. بۇل اسىرەسە قاربالاس ۋاقىتتا كوپىرلەرگە كىرىپ-شىعاتىن جولدارداعى كەپتەلىستى ازايتۋعا مۇمكىندىك بەرەدى.

جوبا بويىنشا حۋسەين بەن تالال كوشەسى جالپى قالالىق ماڭىزى بار ماگيسترال بولادى. جول سەگىز جولاقتى ەتىپ سالىنادى.

- قازىر ينۆەستور ەسىل وزەنى ارقىلى وتەتىن كوپىردىڭ جوباسىن ازىرلەپ جاتىر. قۇرىلىستىڭ ناقتى قۇنى جوبا دايىن بولىپ، مەملەكەتتىك ساراپتامانىڭ قورىتىندىسى شىققاننان كەيىن بەلگىلى بولادى، - دەپ حابارلادى باسقارما.

ينۆەستور دايىن جوبانى قالا بالانسىنا وتكىزگەننەن كەيىن كولىك باسقارماسى كوپىردى مەملەكەتتىك قاراجات ەسەبىنەن سالۋ ماسەلەسىن قارايدى. قۇرىلىس جۇمىستارىن جۇرگىزەتىن مەردىگەر مەملەكەتتىك ساتىپ الۋ ارقىلى انىقتالادى.

ازىرگە كوپىر قۇرىلىسىنىڭ قاشان اياقتالىپ، پايدالانۋعا بەرىلەتىنى بەلگىسىز. مەرزىمى جوبانىڭ قارجىلاندىرىلۋىنا بايلانىستى بولادى.

بۇعان دەيىن استانانىڭ 2026-جىلعا ناقتىلانعان بيۋجەتىنىڭ جالپى كولەمى 1490674 ميلليون تەڭگە ەكەنى حابارلاندى.