استانادا سوعىم جارمەڭكەسىن سول جاعالاۋدا وتكىزۋ جوسپارلانىپ وتىر

استانا. KAZINFORM - ەلوردادا «سوعىم Fest» ەت جارمەڭكەسىن سول جاعالاۋدا دا وتكىزۋ كوزدەلىپ وتىر.

ет
Фото: Мухтор Холдорбеков/Kazinform

بۇل تۋرالى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭابايەۆ مالىمدەدى.

ونىڭ ايتۋىنشا، قازىر جارمەڭكە ەلوردانىڭ ءۇش ساۋدا الاڭىندا ءوتىپ جاتىر.

- جارمەڭكەنى سول جاعالاۋدا دا وتكىزۋدى جوسپارلاپ وتىرمىز. قازىر ونى قاي جەردە ۇيىمداستىرۋعا بولاتىنىن تالقىلاپ جاتىرمىز،-دەدى ماقسات جاڭابايەۆ استانا قالاسىنىڭ كوممۋنيكاتسيالار قىزمەتىندە وتكەن باسپا ءسوز كونفەرەنتسياسىندا.

قاراشادا باستالعان جارمەڭكە جەلتوقساننىڭ سوڭىنا دەيىن ءار سەنبى مەن جەكسەنبىدە مىنا مەكەنجايلاردا وتەدى:

· Keruen Joly ساۋدا ورتالىعى - الاش تاسجولى، 35ب؛

· «ەت الەمى» ساۋدا ورتالىعى - الاش تاسجولى، 31/1؛

· Jurt ساۋدا ورتالىعى - بەيبارىس سۇلتان كوشەسى، 3.

جارمەڭكەدە سيىر ەتىنىڭ كەلىسى 3300 تەڭگەدەن، جىلقى ەتى 3500 تەڭگەدەن، قوي ەتى 3700 تەڭگەدەن باستالادى.

باسقارما وكىلىنىڭ ايتۋىنشا، جارمەڭكەدەگى باستاپقى باعالار رەسپۋبليكالىق ورتاشا باعادان تومەن. اتاپ ايتقاندا، جىلقى ەتى 19 پايىزعا، قوي ەتى 17 پايىزعا، سيىر ەتى 13 پايىزعا ارزان.

ماسەلەن، 50 كەلى جىلقى ەتىن جارمەڭكەدەگى باستاپقى باعامەن ساتىپ العان تۇرعىن رەسپۋبليكالىق ورتاشا باعامەن سالىستىرعاندا 42 مىڭ تەڭگەگە جۋىق قاراجات ۇنەمدەي الادى.

استانادا «سوعىم Fest» جارمەڭكەسى ءۇشىنشى جىل قاتارىنان وتكىزىلىپ كەلەدى. مۇندا تۇرعىندار ەتتى وندىرۋشىلەردىڭ وزىنەن دەلدالسىز ساتىپ الا الادى.

ەسكە سالايىق، بيىل استانادا «سوعىم- FEST» جارمەڭكەسى اياسىندا 1 مىڭ توننادان استام ەت ساتۋ جوسپارلانعان ەدى.