استانادا قىستا قانداي ەرەكشە دەمالىس ورىندارى اشىلادى

قىستا سەرۋەندەپ، دەمالۋعا بولاتىن ورىنداردىڭ ءبىرى - ەسىل وزەنىنىڭ جاعالاۋى

سونداي-اق سارىارقا اۋدانىندا، سونىڭ ىشىندە وقۋشىلار سارايىنىڭ ماڭىندا مۇز ايدىندارى اشىلادى. بۇدان بولەك، اۋداندا 13 مۇز سىرعاناعى سالىنادى. قىسقى دەمالىس ورىندارى «كوكتال» ساياباعىندا، «وقجەتپەس» گۇلزارىندا جانە باسقا دا قوعامدىق ورىنداردا ۇيىمداستىرىلادى.

ەلورداداعى ەڭ ەرەكشە قىسقى ورىنداردىڭ ءبىرى - ەسىل اۋدانىندا، Abu Dhabi Plaza كەشەنىنىڭ ماڭىندا اشىلاتىن Astana Winter park. بۇل - ۇزىندىعى 1,4 شاقىرىم بولاتىن اۋقىمدى مۇز ايدىنى.

مۇز جابىنىنىڭ جالپى اۋدانى شامامەن 6 مىڭ شارشى مەتردى قۇرايدى. ادەتتەگى مۇز ايدىندارىنان ەرەكشەلىگى - مۇندا شەڭبەر بويىمەن سىرعاناپ قانا قويماي، ۇزىن مۇز جولىمەن سەرۋەندەۋگە بولادى.

كەلۋشىلەرگە قولايلى جاعداي جاساۋ ءۇشىن جىلى پاۆيلوندار، كونكي جالعا بەرۋ ورىندارى، وتباسىلىق دەمالىس ايماقتارى مەن ساندىك جارىقتاندىرۋ قاراستىرىلعان. مۇزدى ارنايى جۇيە ارقىلى سالقىنداتىپ وتىرۋدىڭ ارقاسىندا كۇن جىلى كەزدە دە مۇز ايدىنى جۇمىس ىستەي الادى.

سارايشىق اۋدانىنداعى قىسقى دەمالىس ورىندارىنىڭ ءبىرى - «قازاق ەلى» الاڭى

مۇندا مۇز ايدىنىن اشۋ جوسپارلانىپ وتىر. تاعى ەكى مۇز ايدىنى جۇرگەنوۆ كوشەسىندە جانە پرەزيدەنتتىك ساياباقتا اشىلادى.

ەلورداداعى تاعى ءبىر قىزىقتى قىسقى دەمالىس ورنى - الماتى اۋدانىنداعى Triathlon Ice Par

ترياتلون ساياباعىندا اۋدانى 1200 شارشى مەتر بولاتىن زاماناۋي مۇز ايدىنى سالىنىپ جاتىر. مۇندا استانا تۇرعىندارى مەن قوناقتارى كۇن سالىستىرمالى تۇردە جىلى بولعان كەزدە دە بەلسەندى دەمالا الادى.

ارنايى توڭازىتقىش جابدىقتارى مەن مۇزدى ساقتاۋ تەحنولوگياسىنىڭ كومەگىمەن الاڭ اۋا تەمپەراتۋراسى ءسال جىلىنعان كەزدە دە جۇمىسىن جالعاستىرا الادى.

كەلۋشىلەرگە كونكي جالعا بەرۋ قىزمەتى، جىلىنىپ دەمالاتىن ورىن، ىستىق سۋسىندار مەن تاماقتانۋ ورىندارى قاراستىرىلعان. ال ساندىك جارىقتار مۇز ايدىنىنا ەرەكشە كورىك بەرىپ، كەشكى سەرۋەن مەن وتباسىلىق دەمالىسقا قولايلى جاعداي جاسايدى.

الماتى اۋدانىندا دا قىسقى دەمالىس ورىندارى اشىلادى. اتاپ ايتقاندا، «قۇمىرا» اۋماعىندا، «جەرۇيىق» جانە «جاستار» ساياباقتارىندا ارنايى الاڭدار اشۋ جوسپارلانعان.

بايقوڭىر اۋدانىندا «اتاتۇرىك» ساياباعى مەن «جاستار» سارايىنىڭ ماڭىندا مۇز ايدىندارى ازىرلەنىپ جاتىر. سونىمەن قاتار ءوندىرىس، كىرپىشتى، قازقالاشىق تۇرعىن الاپتارىندا جانە قوياندى ساياجاي الابىندا دا سىرعاناقتار ورناتىلادى. بارلىعى توعىز ورىن قامتىلماق.

قىسقى دەمالىسقا ارنالعان تاعى ءبىر ورىن نۇرا اۋدانىندا اشىلادى. مۇز ايدىنىن «استانا ارەنا» ستاديونىنىڭ ماڭىندا جابدىقتاۋ كوزدەلگەن.

قازىر ەلورداداعى قوعامدىق كەڭىستىكتەردى قىسقى ماۋسىمعا دايىنداۋ جۇمىسى ءجۇرىپ جاتىر. اتالعان مۇز ايدىندارى مەن سىرعاناقتار - بيىل استانا تۇرعىندارى مەن قوناقتارى ءۇشىن اشىلاتىن قىسقى دەمالىس ورىندارىنىڭ ءبىر بولىگى عانا. قازىر قالانىڭ وزگە اۋداندارىندا دا وسىنداي الاڭداردى دايىنداۋ جۇمىسى ءجۇرىپ جاتىر.

تابيعي مۇز قۇيۋ جۇمىسى كۇن سالقىنداعاننان كەيىن باستالادى. قوسىمشا دەمالىس ورىندارى مەن ولاردىڭ قاشان اشىلاتىنى تۋرالى اقپارات دايىندىق جۇمىسى اياقتالعان سايىن جاريالانىپ وتىرادى.

وسىلايشا، بيىل قىسقى دەمالىس تەك قالانىڭ ورتالىق بولىگىندە عانا ەمەس، تۇرعىن الاپتاردا دا ۇيىمداستىرىلادى. بۇل تۇرعىندارعا الىسقا بارماي-اق، ءۇيىنىڭ ماڭىندا تازا اۋادا سەرۋەندەپ، بەلسەندى دەمالۋعا مۇمكىندىك بەرەدى.