استانادا قوعامدىق كولىكتە جول ءجۇرۋ اقىسى 150 تەڭگەگە كوتەرىلمەك

ەلوردا اكىمدىگىنىڭ مالىمەتىنشە، قالادا قوعامدىق كولىكتە جول ءجۇرۋ تاريفى 90 تەڭگە مولشەرىندە 2014-جىلى بەلگىلەنگەن. وتكەن 12 جىل ىشىندە جول ءجۇرۋ اقىسى نەبارى ءبىر رەت قايتا قارالىپ، بۇگىندە 110 تەڭگەنى قۇراپ وتىر.

- بۇل رەتتە 2014-جىلدان بەرى تاسىمالداۋشىلاردىڭ نەگىزگى شىعىندارى، اتاپ ايتقاندا، جانارماي، قوسالقى بولشەكتەر مەن جاڭا اۆتوبۋستاردىڭ قۇنى، سونداي-اق جۇرگىزۋشىلەردىڭ ەڭبەكاقىسىنا جۇمسالاتىن شىعىندار ايتارلىقتاي ءوستى. ماسەلەن، 2014-جىلى ديزەل وتىنىنىڭ ءبىر ليترى شامامەن 107 تەڭگە بولسا، قازىرگى ۋاقىتتا ونىڭ باعاسى 329 تەڭگەنى قۇرايدى. وسىلايشا، اتالعان كەزەڭدە ديزەل وتىنىنىڭ قۇنى 3 ەسەدەن استام ۇلعايدى، - دەپ اتاپ وتەدى اكىمدىكتەن.

تاراتىلعان مالىمەتكە قاراعاندا، جۇرگىزۋشىلەردىڭ ەڭبەكاقىسىنا جۇمسالاتىن شىعىن دا ايتارلىقتاي ارتتى. ماسەلەن، 2014-جىلى جۇرگىزۋشىلەردىڭ ورتاشا جالاقىسى شامامەن 100-150 مىڭ تەڭگەنى قۇراسا، قازىرگى ۋاقىتتا اۆتوبۋس كلاسى مەن جۇمىس رەجيمىنە قاراي 700 مىڭ تەڭگەدەن باستالادى. وسى كەزەڭدە قوسالقى بولشەكتەردىڭ، اۆتوموبيل شينالارىنىڭ، اككۋمۋلياتور باتارەيالارىنىڭ، اۆتوبۋستارعا تەحنيكالىق قىزمەت كورسەتۋ مەن جوندەۋ جۇمىسىنىڭ، سونداي-اق جاڭا جىلجىمالى قۇرامدى ساتىپ الۋ قۇنى دا ەداۋىر ارتتى.

- شىعىننىڭ ايتارلىقتاي وسۋىنە قاراماستان، ەلوردادا قوعامدىق كولىكتى كەزەڭ-كەزەڭىمەن جاڭارتۋ جانە دامىتۋ جۇمىسى ءجۇرىپ جاتىر. سوڭعى ءۇش جىلدا تاسىمالداۋشىلار قاۋىپسىزدىك، جايلىلىق جانە ەكولوگيالىق تالاپتارعا ساي كەلەتىن 1127 جاڭا جىلجىمالى قۇرام ساتىپ الدى، - دەدى اكىمدىك.

دەگەنمەن، قالادا تەگىن جول ءجۇرۋ قۇقىعى ازاماتتاردىڭ مىنا ساناتتارىنا بەرىلەدى:

1. ەكىنشى دۇنيەجۇزىلىك سوعىس قاتىسۋشىلارى مەن مۇگەدەكتەرى جانە ولارعا تەڭەستىرىلگەن ازاماتتار؛

2. جاسى بويىنشا جانە ەڭبەك سىڭىرگەن جىلدارى بويىنشا زەينەتكەرلەر، سونداي-اق زەينەت جاسىنا جەتكەن، جاسى بويىنشا جانە اسىراۋشىسىنان ايىرىلۋىنا بايلانىستى مەملەكەتتىك الەۋمەتتىك جاردەماقى الۋشىلار؛

3. كوپبالالى انالار؛

4. كوپبالالى وتباسىلار؛

5. مۇگەدەكتىگى بار ادامدار؛

6. ون سەگىز جاسقا دەيىنگى مۇگەدەكتىگى بار بالالار، ونىڭ ىشىندە ولاردىڭ اتا-انالارىنىڭ (زاڭدى وكىلدەرىنىڭ) ءبىرى؛

7. قازاقستانداعى 1986-جىلعى 17-18-جەلتوقسان وقيعالارىنا قاتىسۋشىلار اراسىنان ساياسي قۋعىن-سۇرگىن قۇرباندارى، «جاپپاي ساياسي قۋعىن-سۇرگىندەر قۇرباندارىن اقتاۋ تۋرالى» قازاقستان رەسپۋبليكاسىنىڭ زاڭىندا بەلگىلەنگەن تارتىپپەن اقتالعاندار.

مۇنان بولەك، 2020-جىلعى ناۋرىزدان باستاپ استانادا ءبىلىم الاتىن 18 جاسقا دەيىنگى بالالار ءۇشىن دە جول ءجۇرۋ تەگىن.

- سونىمەن بىرگە تۇراقتى مارشرۋتتار بويىنشا جولاۋشىلار مەن باگاجدى تاسىمالداۋ جونىندە قىزمەت كورسەتۋگە تاريفتەر ەسەپتەۋ ادىستەمەسىنە سايكەس جۇرگىزىلگەن ەسەپتەۋلەرگە ساي، 2026-جىلى ءبىر ساپاردىڭ ورتاشا ەسەپتىك قۇنى قولدانىستاعى جول ءجۇرۋ اقىسىنان ايتارلىقتاي جوعارى. پايدالانۋ شىعىندارىنىڭ وسۋىنە، قوعامدىق كولىكتىڭ تۇراقتى جۇمىسىن قامتاماسىز ەتۋگە، اۆتوبۋس پاركىن ودان ءارى جاڭارتۋعا جانە مارشرۋتتىق جەلىنى دامىتۋ قاجەتتىلىگىنە بايلانىستى 1-جەلتوقساننان باستاپ قولما-قول اقشاسىز تولەم كەزىندە جول ءجۇرۋ اقىسىن 150 تەڭگە مولشەرىندە بەلگىلەۋ ۇسىنىلادى، - دەلىنگەن جەرگىلىكتى اتقارۋشى ورگان تاراپى جاريالاعان اقپاراتتا.

بۇعان دەيىن استانادا كومىر قانشا تۇراتىنىن جانە قايدان ساتىپ الۋعا بولاتىنىن جازعان ەدىك.