استانادا كەپتەلىستى ازايتۋ ءۇشىن كولىك قوزعالىسى اۆتوماتتاندىرىلادى

جول ءجۇرىسىن باسقارۋدىڭ اۆتوماتتاندىرىلعان جۇيەسىن ەنگىزۋ ماقساتى - استانا قالاسىنىڭ تۇرعىندارى ءۇشىن كولىكتىك قولجەتىمدىلىكتى قامتاماسىز ەتۋ، ونىڭ ىشىندە كوشە-جول جەلىسىنىڭ وتكىزۋ قابىلەتتىلىگىن جوعارىلاتۋ، اپاتتىلىقتى ازايتۋ، قوعامدىق كولىكتىڭ جۇمىس ىستەۋ تيىمدىلىگىن ارتتىرۋ.

جول ءجۇرىسىن باسقارۋدىڭ اۆتوماتتاندىرىلعان جۇيەسىنىڭ مىندەتتەرى مىناداي:

- كولىك جۇيەسىنىڭ پايدالانۋ تيىمدىلىگىن ارتتىرۋ؛

- كولىك اعىندارىنىڭ وتكىزۋ قابىلەتتىلىگىن ۇلعايتۋ؛

- كولىكتىڭ ءار تۇرلەرىن پايدالانۋمەن بايلانىستى جولداعى كىدىرىستەردى ازايتۋ؛

- جولداعى ىڭعايلىق پەن جايلىلىقتى ارتتىرۋ؛

- قوعامدىق كولىكتىڭ كولىكتىك قولجەتىمدىلىگىن ۇلعايتۋ؛

- جولدىڭ جوسپارلانعان ۋچاسكەسىن ءوتۋ ۋاقىتىنىڭ سەنىمدىلىگى؛

- جول ءجۇرىسى ۋچاسكەلەرىنىڭ جالپى جانە جەكە قاۋىپسىزدىگى؛

- جول ءجۇرىسىنىڭ قاۋىپسىزدىگىن قامتاماسىز ەتۋ؛

- جول ءجۇرىسى قاتىسۋشىلارىنىڭ قاۋىپسىزدىگىن ۇلعايتۋ؛

- جول-كولىك وقيعالارىنىڭ سانىن قىسقارتۋ؛

اۆتوماتتاندىرىلعان جۇيەلەردى ەنگىزۋ، پايدالانۋ جانە باسقارۋ جۇمىستارىن باسقارۋشى كومپانيا جۇزەگە اسىرادى. جۇيەنى ازىرلەپ، ەنگىزۋ تۋرالى شەشىم قابىلدانعانعا دەيىن باسقارۋشى كومپانيا ەلورداداعى كولىك جاعدايىنا كەشەندى تالداۋ جۇرگىزۋى ءتيىس.

اتاپ ايتقاندا، كوشە-جول جەلىسىنىڭ قازىرگى جاعدايى، ونى دامىتۋ جانە قايتا قۇرۋ جوسپارلارى، كولىك قوزعالىسىنىڭ قارقىندىلىعى مەن جىلدامدىعى زەرتتەلەدى. سونىمەن قاتار جولاۋشىلار اعىنى، جول قوزعالىسى قيىندايتىن ۋچاسكەلەر مەن جول- كولىك وقيعالارى ءجيى بولاتىن ورىندار تۋرالى ستاتيستيكا ەسكەرىلەدى.

زەرتتەۋ بارىسىندا تاڭعى جانە كەشكى ۋاقىتتاعى، سونداي-اق ماۋسىمدىق كەزەڭدەردەگى كولىك جۇكتەمەسى دە تالدانادى. كوشە-جول جەلىسىنىڭ جەكەلەگەن ۋچاسكەلەرىنىڭ وتكىزۋ قابىلەتىنە سۇرانىس پەن كولىك اعىندارىنىڭ قوزعالىسى بويىنشا دەرەكتەر جينالادى.

بۇدان بولەك، ينتەللەكتۋالدى كولىك جۇيەسىن ەنگىزۋ جوسپارلانعان اۋماقتىڭ توپولوگيالىق كارتاسى ازىرلەنىپ، كولىك قۇرالدارىنىڭ تۇرلەرى بويىنشا قوزعالىس قارقىندىلىعى مەن جىلدامدىعى سارالانادى.

جاڭا اۆتوماتتاندىرىلعان جۇيە ارقىلى كولىك قوزعالىسىن ۇيىمداستىرۋ كەزىندە جول قاۋىپسىزدىگى، كولىك اعىنىنىڭ تيىمدىلىگى جانە قوعامدىق كولىكتىڭ قوزعالىسى بويىنشا كورسەتكىشتەر ەسكەرىلەدى.

بۇعان دەيىن ەلوردا اكىمدىگى ەكى دەڭگەيلى جولايرىق سالۋ جوباسىنا قاتىستى تۇسىنىك بەردى.