استانادا جوعالىپ كەتكەن جاس ءوسپىرىم قالا سىرتىنداعى تاسجولدان تابىلدى
استانا. KAZINFORM - استانادا 9-مامىردا جوعالعان جاس ءوسپىرىم قالا ماڭىنداعى اۋىلداردىڭ بىرىنەن تابىلدى. اتا-اناسىمەن اراداعى كەلىسپەۋشىلىك سالدارىنان ول ۇيىنەن كەتىپ، مەشىتتە تۇنەگەن، دەپ حابارلايدى turkystan.kz.
ۆەدومستۆو حابارلاۋىنشا، 9-مامىر كۇنى پوليتسياعا كامەلەتكە تولماعان بالانىڭ جوعالعانى تۋرالى ارىز تۇسكەن. اتا-اناسى جاس ءوسپىرىم ءبىر كۇن بۇرىن قوسىمشا ساباققا كەتىپ، ۇيىنە ورالماعان. كەيىن ول اتا-اناسىمەن تۇسىنىسە الماعاندىقتان، ءوز ەركىمەن ۇيدەن كەتىپ قالعانى بەلگىلى بولعان.
«ىزدەستىرۋ بارىسىندا كامەلەتكە تولماعان بالانىڭ اۆتوبۋسپەن سوڭعى ايالداماعا دەيىن بارىپ، كەيىن تاسجول بويىمەن جاياۋ جۇرگەنى انىقتالدى. جاس ءوسپىرىم اقجار اۋىلىنداعى مەشىتتە تۇنەپ شىققان. پوليتسەيلەر جەرگىلىكتى تۇرعىندار مەن جول بويىنداعى جۇرگىزۋشىلەردەن جاۋاپ الىپ، ونىڭ ءارى قاراي جۇرگەن باعىتىن انىقتادى. ناتيجەسىندە پوليتسەيلەر جاس ءوسپىرىمدى قالا سىرتىنداعى تاسجول بويىنان تاۋىپ، امان-ەسەن اتا-اناسىنا تاپسىردى»، - دەلىنگەن حابارلامادا.
ونىڭ ءومىرى مەن دەنساۋلىعىنا ەشقانداي قاۋىپ جوق. وتباسىمەن پروفيلاكتيكالىق اڭگىمە جۇرگىزىلگەن.
