استانادا جاس جىگىت ءتىس ەمدەۋ كەزىندە كوز جۇمدى: د س م تۇسىنىكتەمە بەردى
استانا. KAZINFORM - استانادا 20 جاستاعى جىگىت ءتىس ەمدەتۋگە بارىپ، قايتىس بولدى. بۇل جاعداي قوعامدا رەزونانس تۋدىرىپ وتىر.
الدىن الا مالىمەتتەرگە قاراعاندا، مەديتسينالىق تالاپتار ساقتالماعان بولۋى مۇمكىن. بۇل قانشالىقتى راس؟
بۇل تۋرالى ق ر د س م مەديتسينالىق جانە فارماتسەۆتيكالىق باقىلاۋ كوميتەتى ءتوراعاسىنىڭ ورىنباسارى نۇردانات بەركىنعالي Jibek Joly ارناسىنىڭ «بۇگىن LIVE» ەفيرىندە ايتتى.
- بىرىنشىدەن، اتالعان اقپارات الەۋمەتتىك جەلىلەردە تارالىپ كەتتى. قازىرگى ۋاقىتتا تەكسەرۋ جۇمىستارى جۇرگىزىلىپ جاتىر. ءبىزدىڭ بىلۋىمىزشە، قىلمىستىق ءىس قوزعالعان. ءبىراق ق ر قىلمىستىق-پروتسەستىك كودەكسىنىڭ 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى. بارلىق قورىتىندى تەرگەۋ ارەكەتتەرىنىڭ ناتيجەلەرى بويىنشا جاسالادى. قازىرگى تاڭدا دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتى، سونداي-اق قۇقىق قورعاۋ ورگاندارى تەكسەرۋ جۇرگىزىپ جاتىر. وسى تەكسەرۋ ناتيجەسىندە جاۋاپكەرشىلىك ايقىندالىپ، ىسكە قاتىسى بار ءاربىر تۇلعانىڭ ارەكەتىنە قۇقىقتىق باعا بەرىلەدى، - دەدى نۇردانات بەركىنعالي.
سپيكەردىڭ ايتۋىنشا، تەكسەرۋ كەزىندە رۇقسات بەرۋ قۇجاتتارى، ليتسەنزيانىڭ بولۋى، بىلىكتىلىك تالاپتارىنىڭ ساقتالۋى جانە مەديتسينالىق قىزمەت كورسەتۋ ستاندارتتارىنىڭ ورىندالۋى قارالادى.
- تەكسەرۋ قورىتىندىسى بويىنشا قانداي دا ءبىر زاڭ بۇزۋشىلىقتار انىقتالعان جاعدايدا، قولدانىستاعى زاڭناماعا سايكەس ءتيىستى شارالار قابىلدانادى. ولار اكىمشىلىك نەمەسە وزگە دە سيپاتتاعى شارالار بولۋى مۇمكىن. الدىمەن تەكسەرۋدى تولىق اياقتاپ، ءتيىستى باعاسىن بەرۋ قاجەت دەپ سانايمىن. تەكسەرۋ بارىسىندا مەديتسينا قىزمەتكەرلەرىنىڭ دايىندىعى مەن ماتەريالدىق-تەحنيكالىق قامتاماسىز ەتىلۋ دەڭگەيى انىقتالادى. جەتكىلىكسىزدىك انىقتالعان جاعدايدا دەنساۋلىق ساقتاۋ باسقارماسىنا قوسىمشا وقىتۋ جۇرگىزۋ جانە قاجەتتى جابدىقتارمەن قامتاماسىز ەتۋ بويىنشا ۇسىنىمدار بەرىلەدى، - دەدى ول.
