استانادا باۋىرجان مومىش ۇلى تۋرالى جاڭا قويىلىمنىڭ پرەمەراسى وتەدى
استانا. قازاقپارات - 7-8 جەلتوقسان كۇندەرى ەلورداداعى قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىندا «مومىش ۇلى» دەرەكتى دراماسىنىڭ پرەمەراسى وتەدى.
قارت باۋىرجان مەن جاس جۋرناليستىڭ سۇحباتى - قويىلىمنىڭ نەگىزگى ارقاۋى. ءۇش بۋىننىڭ كوزقاراسى توعىسقان تۋىندىدا باتىردىڭ وتكەن ءومىرى مەن ىشكى الەمى اشىلادى. سپەكتاكلدە مومىش ۇلى تۋرالى بۇرىن جاريالانباعان دەرەكتەر كورەرمەن نازارىنا ۇسىنىلادى.
قازاقستاننىڭ ەڭبەك سىڭىرگەن قايراتكەرى، تەاتر جانە كينو اكتەرى باقىت باقتان ۇلى قويىلىمنىڭ Instagram پاراقشاسىندا جاريالانعان بەينەجازبادا تۋىندىنىڭ دۇنيەگە كەلۋىنە باتىردىڭ بويىنداعى اسىل قاسيەتتەر تۇرتكى بولعانىن ايتتى.
- ەڭ ءبىرىنشى تۇرتكى - ءبىزدىڭ باۋىرجان اتامىزداي ۇلى تۇلعانىڭ تۇلا بويىنداعى اسىل قاسيەتتەر شىعار. ءوزىنىڭ ەلىنە، وتانىنا، حالقىنا دەگەن ماحابباتى، ول كىسىنىڭ ار، نامىس، وجدان دەگەن ۇلى ۇعىمدى ءومىر بويى تۋ ەتىپ وتكەنى شىعار دەپ ويلايمىن،-دەدى اكتەر.
باقىت باقتان ۇلى ەر ازاماتتىڭ ەل الدىنداعى بورىشى تۋرالى وي قوزعاپ، باتىردىڭ ار مەن نامىس جايلى ايتقان سوزدەرىن مىسالعا كەلتىردى.
- جالپى باۋىرجان اتامىز ايتادى: «كەشكىسىن جاستىققا باسىڭدى قويار الدىندا ارىڭ، وجدانىڭنىڭ الدىندا ەسەپ بەرە الساڭ، مىنە، ناعىز باقىت سول» دەيدى. سول سەبەپتى ەگەر ءبىز ءارقايسىمىز ءوزىمىزدىڭ ىستەگەن ىستەرىمىزدىڭ الدىندا ەسەپ بەرە الساق، ول راسىندا دا ۇلكەن ءبىر باقىت شىعار،- دەدى باقىت باقتان ۇلى.
قويىلىمنىڭ سەناري اۆتورى - نازگۇل سارىباي، قويۋشى رەجيسسەرى - جۇلدىزبەك جۇمانباي، پروديۋسەرى - قۋانىش قونىسبەك.
باۋىرجان مومىش ۇلىنىڭ ءرولىن باقىت باقتان ۇلى مەن باۋىرجان ەسكوجان ۇلى سومدايدى. باتىردىڭ جاس كەزىن قۋانىش ايدار ۇلى، جامبىل جابايەۆتىڭ ءرولىن دوسجان ابدەرايم ۇلى وينايدى.
ەسكە سالايىق، بىلتىر باۋىرجان مومىش ۇلىنىڭ 115 جىلدىعىنا وراي ورتالىق مەملەكەتتىك ارحيۆتە باتىردىڭ ءومىرى مەن قىزمەتىنە قاتىستى بۇرىن بەلگىسىز بولعان قۇجاتتار كورمەگە قويىلعان ەدى.