استانادا 9-مامىرعا وراي قانداي ءىس-شارالار وتەدى

قالا تۇرعىندارى مەن قوناقتارىنا ارناپ كونسەرتتەر، سپەكتاكلدەر، كوشە اكسيالارى، كورمەلەر مەن پاتريوتتىق باستامالار ۇيىمداستىرىلادى، دەپ حابارلايدى استانا اكىمدىگىنىڭ رەسمي سايتى.

مەرەكەلىك ءىس-شارالار قالانىڭ ءارتۇرلى اۋماعىندا ءوتىپ، مادەني، الەۋمەتتىك جانە ءبىلىم بەرۋ باعىتتارىن قامتيدى.

8-مامىر كۇنى ساعات 11:00 دە نۇرلى جول تەمىرجول ۆوكزالى عيماراتىندا 9-مامىرعا ارنالعان تاقىرىپتىق كورمە اشىلادى.

ەلوردانىڭ مەملەكەتتىك ءارحيۆى «ەرلىك داستانى» تاريحي-قۇجاتتىق كورمەسىن جانە تىل ەڭبەككەرلەرىنە ارنالعان ماتەريالدار ەكسپوزيتسياسىن ۇسىنادى.

سول كۇنى ساعات 19:00 دە ە. راحماديەۆ اتىنداعى مەملەكەتتىك اكادەميالىق فيلارمونيا ساحناسىندا «ەرلىك داستانى» مەرەكەلىك كونتسەرتى وتەدى.

سونىمەن قاتار ساعات 19:00 دە م. گوركي اتىنداعى مەملەكەتتىك اكادەميالىق ورىس دراما تەاترى كورەرمەندەرگە «ءاليا» سپەكتاكلىن ۇسىنادى.

9-مامىر كۇنى ساعات 12:00 دە ازەربايجان مامبەتوۆ اتىنداعى مەملەكەتتىك دراما جانە كومەديا تەاترى الدىندا مەرەكەلىك كونتسەرت ۇيىمداستىرىلادى.

سونداي-اق ءدال وسى ۋاقىتتا قالالىق الاڭ اۋماعىندا ەسترادا جۇلدىزدارىنىڭ قاتىسۋىمەن جەڭىس كۇنىنە ارنالعان كونتسەرت وتەدى.

كەشكى ساعات 18:00 دە تەاتر ساحناسىندا «ار ادامى - باۋىرجان» قويىلىمى كورسەتىلەدى.

سونىمەن قاتار مۋزىكالىق جاس كورەرمەن تەاترى ساحناسىندا «مانشۇك» سپەكتاكلى قويىلادى.

وسى كۇنى ساعات 18:00 دە امفيتەاتر اۋماعىندا مەرەكەلىك كونسەرت وتەدى.

ال ق. قۋانىشبايەۆ اتىنداعى قازاق ۇلتتىق مۋزىكالىق-دراما تەاترى ساحناسىندا «جەڭىس كۇنى» سيمفونيالىق وركەستر كونتسەرتى ۇيىمداستىرىلادى.

بۇعان دەيىن استانادا 300 گە جۋىق ادام قاتىسقان پاتريوتتىق فلەشموب وتكەنىن جازدىق.