استانادا 6 قارجى پيراميداسىنىڭ قىزمەتى توقتاتىلدى
استانا. KAZINFORM - بۇگىندە كولەڭكەلى ەكونوميكانىڭ كەڭ تارالعان تۇرلەرىنىڭ ءبىرى - ازاماتتارعا ميلليونداعان تەڭگە كولەمىندە شىعىن كەلتىرەتىن قارجى پيراميدالارى. ادەتتە، قارجى پيراميدالارىنا وڭاي ولجاعا كەنەلۋدى كوزدەيتىن ءارتۇرلى جاستاعى ازاماتتار تارتىلادى.
بۇل تۋرالى استانا قالاسى پروكۋرورىنىڭ كومەكشىسى اسلان ءمادي مالىمدەدى.
- جىل باسىنان بەرى قالا اۋماعىندا التى قارجى پيراميداسىنىڭ «WYP. KZ» ،«Sinsera Systems» ،«Life is Good» ،«Sirius Energy» ،«World Business Consulting» ،«Buyers Union» قىزمەتى توقتاتىلدى، - دەدى ول استانا قالاسىنىڭ كوممۋنيكاتسيالار قىزمەتىندە وتكەن بريفينگتە.
سونىمەن قاتار ول قازىرگى ۋاقىتتا استانا قالاسى بويىنشا ەكونوميكالىق تەرگەپ-تەكسەرۋ دەپارتامەنتى «WYP. KZ» ينتەرنەت-دۇكەنىنە قاتىستى قىلمىستىق ءىستى تەرگەپ جاتقانىن ايتتى.
الاياقتىقتىڭ نەگىزگى ءتاسىلى - «iPhone» ماركالى ۇيالى تەلەفوندار مەن باسقا دا ءتۇرلى تەحنيكانى نارىقتاعى باعادان تومەن ساتۋ بولعان. الايدا ۇيىمداستىرۋشىلار تاۋارلاردى نارىقتاعى ناقتى باعاسىمەن ساتىپ العان.
- جاڭادان كەلگەن ساتىپ الۋشىلاردان تۇسكەن قاراجات بۇرىنعى كليەنتتەر الدىنداعى مىندەتتەمەلەردى ورىنداۋعا جۇمسالعان. الايدا تاپسىرىستار سانىنىڭ ارتۋى مەن اينالىم قاراجاتىنىڭ جەتىسپەۋشىلىگى سالدارىنان كەيىنگى ساتىپ الۋشىلار الدىندا بەرەشەك پايدا بولعان، - دەدى اسلان ءمادي.
بۇدان بولەك، ينتەرنەت-دۇكەن باسشىلارى جاڭا كليەنتتەردى تارتۋ ماقساتىندا ارنايى جۇيە ۇيىمداستىرعان. بۇل جۇيە بويىنشا ولاردىڭ پروموكودى ارقىلى كەلگەن ءاربىر ساتىپ الۋشى ءۇشىن بەلگىلى ءبىر مولشەردە سىياقى ەسەپتەلىپ وتىرعان.
قازىرگى ۋاقىتتا اتالعان قىلمىستىق ءىس بويىنشا 200 دەن استام ازامات جابىرلەنۋشى دەپ تانىلعان. ولارعا كەلتىرىلگەن جالپى شىعىن كولەمى 216 ميلليون تەڭگەنى قۇرايدى.
قازىرگى ۋاقىتتا تەرگەۋ امالدارى جالعاسىپ جاتىر.
ايتا كەتەيىك، 90 مىڭ ادامنان 25 ميلليارد تەڭگە جيناعان قارجى پيراميداسىنىڭ ۇيىمداستىرۋشىلارى سوتتالدى.
