استانا-نيۋ-يورك: تىكەلەي رەيس قاشان اشىلادى
استانا. KAZINFORM - كەلەسى جىلى استانادان نيۋ-يورككە تىكەلەي رەيس اشىلۋى مۇمكىن. قازىر ەلىمىز ا ق ش-قا ۇشۋعا قاجەتتى رۇقسات الۋعا دايىندالىپ جاتىر.
بۇل تۋرالى ي ك ا و-نىڭ اۆياتسيالىق قاۋىپسىزدىك اپتالىعىندا كولىك ۆيتسە- ءمينيسترى تالعات لاستايەۆ ايتتى.
ونىڭ سوزىنشە، بىرنەشە اپتا بۇرىن قازاقستانعا ا ق ش فەدەرالدىق اۆياتسيا اكىمشىلىگىنىڭ 7-8 ينسپەكتورى كەلگەن. ولار ءبىر اپتا بويى ەلىمىزدىڭ ازاماتتىق اۆياتسيا جۇيەسىن تەكسەردى. قورىتىندى بريفينگتە قازاقستاننىڭ اۆياتسيا سالاسىنا جانە ونىڭ حالىقارالىق ستاندارتتارعا سايكەستىگىنە جوعارى باعا بەرىلگەن.
ا ق ش تاراپىنىڭ رەسمي ەسەبى قاراشا ايىندا دايىن بولادى. ال ەلىمىز جىل سوڭىنا دەيىن رەيس اشۋعا رۇقسات الۋدى كوزدەپ وتىر.
- جەلتوقسان ايىندا وسىنداي ۇزاق باعىتقا ۇشۋعا مۇمكىندىك بەرەتىن Boeing Dreamliner ۇشاعى جەتكىزىلەدى دەپ كۇتىلۋدە. ونى پايدالانۋعا بەرۋ ءۇشىن ەكيپاج بەن تەحنيكالىق ماماندار ءتيىستى دايىندىقتان ءوتىپ، قاجەتتى ۇشۋ ساعاتتارىن جيناۋى كەرەك. بارلىق تالاپ ورىندالسا، كەلەسى جىلى تىكەلەي رەيس اشۋدى جوسپارلاپ وتىرمىز، - دەدى تالعات لاستايەۆ.
العاشقى باعىت رەتىندە نيۋ-يورك قالاسى قاراستىرىلعان. ال تىكەلەي رەيس استانادان ۇشادى.
- رەيس ۇزاق باعىتقا قاتىنايدى. دەگەنمەن، ەكى ەل اراسىنداعى قارىم-قاتىناس دامىپ كەلەدى. قازاقستانعا دەگەن قىزىعۋشىلىق پەن ينۆەستيتسيالىق-ەكونوميكالىق بايلانىس تا ارتىپ وتىر، - دەدى ول.
ازىرگە بيلەت باعاسى ەسەپتەلگەن جوق. جاڭا رەيستىڭ تيىمدىلىگى جولاۋشىلار سۇرانىسىنا دا بايلانىستى بولادى.
ايتا كەتەيىك، جاقىندا الماتىدان ۆەتنام مەن چەحيانى بايلانىستىراتىن رەيس ىسكە قوسىلدى.
