استانا كوشەلەرىنە نە سەبەپتى جاڭبىر سۋى جينالىپ قالادى

- استانا قالاسىنىڭ نوسەرلى كارىز جۇيەسىنە 20 تازارتۋ قۇرىلىسى، 1 جيناقتاۋشى توعان جانە نوسەرلى، درەناجدىق جانە ارىق-لوتوك جەلىلەرىنىڭ 621,6 ك م ماگيسترالدىق كوللەكتورلارى كىرەدى. قولدانىستاعى ينفراقۇرىلىم 20,1 مىڭ گەكتاردان استام اۋماقتاعى جەرۇستى اعىندى سۋلاردى بۇرۋدى قامتاماسىز ەتەدى. سونىمەن قاتار، قۇرىلىس تىعىزدىعىنىڭ جوعارى بولۋىنا جانە قۇبىرجولدارىن جۇرگىزۋگە بوس اۋماقتاردىڭ بولماۋىنا بايلانىستى نوسەرلى كارىز جەلىلەرىن بارلىق اۋماقتا تەحنيكالىق تۇرعىدان جۇرگىزۋ مۇمكىن ەمەس، - دەلىنگەن حابارلامادا.

ۆەدومستۆو مالىمەتىنشە، ق ر قۇرىلىس نورمالارىنا سايكەس، جاۋىن-شاشىن 20 مينۋتتان ارتىق قۇيىپ جاۋعاندا، كوشەلەرگە ۋاقىتشا سۋ جينالۋى قالىپتى قۇبىلىس سانالادى. الايدا جولدارداعى جاۋىن سۋى 2-4 ساعات ىشىندە سورىپ الىنىپ، كوشەلەر تازارتىلۋى ءتيىس.

سونىمەن قاتار، باسقارما كوشەلەرگە سۋ تولعان جاعدايدا ماماندار قالاي جۇمىس ىستەيتىنى ءتۇسىندىردى.

- قاتتى جاڭبىر جاۋعان جاعدايدا ونىڭ سالدارىن جويۋ جانە جينالعان سۋدى سورىپ شىعارۋ ءۇشىن قاجەت بولعان جاعدايدا كوممۋنالدىق قىزمەتتەردىڭ ارنايى تەحنيكاسى مەن ءتيىستى اۆاريالىق بريگادالارى تارتىلادى. تارتىلاتىن تەحنيكا مەن جۇمىسشىلاردىڭ سانى جاۋىن-شاشىن كولەمىنە، سۋ باسقان ۋچاسكەلەردىڭ سانى مەن اۋماعىنا، سونداي-اق قالىپتاسقان جەدەل جاعدايعا قاراي ايقىندالادى. جەكەلەگەن جاعدايلاردا قالانىڭ بىرنەشە ۋچاسكەسىندە ءبىر مەزگىلدە سۋ باسۋ جاعدايلارى تۋىنداعان كەزدە قوسىمشا ارنايى تەحنيكانى تارتۋ قاجەتتىلىگى تۋىنداۋى مۇمكىن. وسىعان بايلانىستى بارلىق ۋچاسكەلەردە جۇمىستاردى ءبىر ۋاقىتتا جۇرگىزۋ ءۇشىن قولدا بار كۇشتەر مەن قۇرالدار جەتكىلىكسىز بولۋى ىقتيمال. سۋدى سورىپ شىعارۋ جانە سۋ باسۋ سالدارىن جويۋ جۇمىستارى الدىمەن نەعۇرلىم پروبلەمالى ۋچاسكەلەردە جۇرگىزىلىپ، قاجەت بولعان جاعدايدا تەحنيكا مەن جۇمىس كۇشتەرى كەيىننەن قايتا بولىنەدى، - دەلىنگەن رەسمي جاۋاپتا.

ايتا كەتەيىك، بۇعان دەيىن استانا كوشەلەرىن سۋ باسقان سوڭ، سۋ سورۋ جۇمىستارى قالاي جۇرگىزىلىپ جاتقانىن جازعانبىز.

اۆتور

الپامىس فايزوللا