استانا الەمدەگى ۇزدىك تۋريستىك باعىتتار تىزىمىنە ەندى

قازاقستان استاناسى 2027-جىلى ساياحاتتاۋعا ۇسىنىلعان الەمنىڭ تۇكپىر-تۇكپىرىندەگى 50 ورىن مەن تۋريستىك اسەر قالدىراتىن تىزىمگە ەندى

Best in Travel 2027 توپتاماسىنا Lonely Planet كومانداسى تاڭداعان 25 تۋريستىك باعىت پەن 25 تۋريستىك اسەر قالدىراتىن ءتىزىم ەنگىزىلگەن. استانا تىزىمگە دەربەس تۋريستىك باعىت رەتىندە ەنىپ، «Best for futuristic skylines» - فۋتۋريستىك ساۋلەتىمەن ەرەكشەلەنەتىن قالا رەتىندە ۇسىنىلدى.

Lonely Planet اۆتورلارى ەلوردانىڭ زاماناۋي ساۋلەتى مەن كوزگە بىردەن تۇسەتىن قالالىق كەلبەتىنە نازار اۋدارعان. قالانىڭ قازىرگى بەينەسىن قالىپتاستىراتىن ەرەكشە ساۋلەتتىك شەشىمدەر مەن نىسانداردىڭ ۇيلەسىمىنە ايرىقشا ءمان بەرىلگەن.

Lonely Planet ءتىڭ استاناعا ارنالعان جەكە گيدىندە دە قالانىڭ ساۋلەتى ەلوردانىڭ باستى ەرەكشەلىكتەرىنىڭ ءبىرى رەتىندە اتالادى. باسىلىم قالانىڭ كورنەكتى نىساندارى قاتارىندا «بايتەرەك» مونۋمەنتىن، «حان شاتىر» ساۋدا جانە ويىن- ساۋىق ورتالىعىن، بەيبىتشىلىك جانە كەلىسىم سارايىن، «قازاقستان» ورتالىق كونسەرت زالىن جانە زاماناۋي ساۋلەتتىڭ باسقا دا نىساندارىن اتاپ وتكەن.

استانانىڭ Best in Travel 2027 تىزىمىنە ەنۋى قازاقستان استاناسىنا دەربەس تۋريستىك باعىت رەتىندە حالىقارالىق قىزىعۋشىلىقتىڭ جوعارى ەكەنىن كورسەتىپ، قالانى الەمدىك تۋريستىك نارىقتا تانىتۋعا قوسىمشا مۇمكىندىك بەرەدى.

بۇعان دەيىن قازاقستان دا Lonely Planet باسىلىمىنىڭ جوعارى باعاسىنا يە بولعان. Best in Travel 2025 توپتاماسىندا ەل ساياحاتتاۋعا ۇسىنىلعان باعىتتاردىڭ قاتارىندا بولدى. ال 2027-جىلعى تىزىمدە استانا مەن ونىڭ زاماناۋي ساۋلەتتىك كەلبەتىنە ەرەكشە نازار اۋدارىلعان.

بۇگىندە استانادا زاماناۋي ساۋلەت ۇلگىلەرى، ۇلكەن قوعامدىق كەڭىستىكتەر جانە قازاقستاندىق ءارى شەتەلدىك ساۋلەتشىلەر جوبالاعان ءتۇرلى نىساندار قاتار ورنالاسقان.

بىرنەشە ونجىلدىق ىشىندە قالا زاماناۋي ساۋلەت شەشىمدەرىن ۇلتتىق ناقىشپەن ۇيلەستىرىپ، وزىندىك كەلبەتىن قالىپتاستىردى.

استانانىڭ Best in Travel 2027 تىزىمىنە ەنۋى ەلورداعا شەتەلدىك تۋريستەردىڭ قىزىعۋشىلىعىن ارتتىرۋى مۇمكىن. بۇل قالا تۋرالى حالىقارالىق دەڭگەيدە كوبىرەك اقپارات تاراتىپ، ونىڭ تۋريستىك مۇمكىندىكتەرىن تانىتۋعا جول اشادى.

اينۇر تۋماكبايەۆا