استانا الەمدەگى 15 يننوۆاتسيالىق قالانىڭ قاتارىنا ەندى
استانا. KAZINFORM - قازاقستاننىڭ استاناسى استانا ب ۇ ۇ- نىڭ مامانداندىرىلعان مەكەمەسى - دۇنيەجۇزىلىك زياتكەرلىك مەنشىك ۇيىمىنىڭ (WIPO) جاڭا حالىقارالىق سىيلىعىنىڭ فيناليستەرى قاتارىنا ەندى.
جىل سايىن بەدەلدى Global Innovation Index (جاھاندىق يننوۆاتسيالار يندەكسىن) جاريالايتىن دۇنيەجۇزىلىك زياتكەرلىك مەنشىك ۇيىمى العاشقى WIPO City of Innovation Award سىيلىعىنىڭ قىسقا ءتىزىمىن رەسمي تۇردە جاريالادى.
حالىقارالىق ماراپاتتىڭ باستى ماقساتى - جاڭا ۇردىستەردى قالىپتاستىراتىن، تەحنولوگيا مەن شىعارماشىلىقتىڭ دامۋىنا قولايلى جاعداي جاسايتىن، سونداي-اق كاسىپكەرلەر، اۆتورلار مەن يننوۆاتورلار ءۇشىن قولايلى ەكوجۇيە قۇراتىن قالالاردى اتاپ ءوتۋ.
ىرىكتەۋ قورىتىندىسى بويىنشا استانا الەمنىڭ تۇكپىر-تۇكپىرىنەن ۇسىنىلعان قالالاردىڭ اراسىنان 15 فيناليستىڭ قاتارىنا كىردى. بۇل ەلوردانىڭ يننوۆاتسيا مەن سيفرلىق ترانسفورماتسيا ورتالىقتارىنىڭ ءبىرى رەتىندەگى مارتەبەسىن راستايدى.
قازاقستان استاناسى الەمنىڭ جانە وڭىرلەردىڭ ءىرى ورتالىقتارىمەن قاتار فيناليستەر تىزىمىنەن ورىن الدى.
ازيا جانە تاياۋ شىعىس: شاڭحاي (قىتاي)، دجايپۋر جانە تيرۋۆانانتاپۋرام (ءۇندىستان)، اممان جانە يربيد (يوردانيا)، مەانگ لامپحۋن جانە رويەت (تايلاند)، ەچاگە (فيليپپين)؛
ەۋروپا: ليۆەرپۋل (ۇلى بريتانيا)، شارلەرۋا (بەلگيا)، كالداش-دا-راينيا (پورتۋگاليا)، ماسكەۋ (رەسەي)؛
سولتۇستىك افريكا: رابات جانە تەتۋان (ماروككو).
WIPO مالىمەتىنشە، سىيلىققا قاتىسۋشىلار قالانى دامىتۋ تۇجىرىمدامالارىن ۇسىنىپ قانا قويماي، ولاردى الداعى 12 اي ىشىندە جۇزەگە اسىرۋ بويىنشا ناقتى مىندەتتەمەلەر دە العان.
استانا زاماناۋي قالالىق ەكوجۇيەنى دامىتۋعا باعىتتالعان كەشەندى ءتاسىلىن ۇسىندى. ونىڭ ىشىندە مەملەكەتتىك قىزمەتتەرگە وزىق تەحنولوگيالاردى ەنگىزۋ، Smart City جۇيەسىن دامىتۋ، ستارتاپتار مەن كرەاتيۆتى يندۋستريالاردى قولداۋ، سونداي-اق قالا تۇرعىندارىنىڭ ءومىر ساپاسىن ارتتىرۋعا باعىتتالعان شەشىمدەردى ىسكە اسىرۋ بار.
بۇل ستراتەگيادا زياتكەرلىك مەنشىك تە ماڭىزدى ءرول اتقارادى. ول پەرسپەكتيۆالى يدەيالاردى ناقتى ءارى قۇقىقتىق تۇرعىدان قورعالعان جوبالارعا اينالدىرۋعا مۇمكىندىك بەرەدى.
WIPO- نىڭ رەسمي سايتىندا حابارلانعانداي، فيناليستەردى ۋربانيستيكا، كرەاتيۆتى ەكونوميكا جانە يننوۆاتسيالىق دامۋ سالالارىنىڭ ساراپشىلارىنان قۇرالعان تاۋەلسىز حالىقارالىق قازىلار القاسى باعالايدى.
WIPO City of Innovation Award العاشقى سىيلىعىنىڭ جەڭىمپازدارى 2026-جىلعى 12-قازاندا WIPO- نىڭ جەنيەۆاداعى شتاب-پاتەرىندە وتەتىن سالتاناتتى ءراسىم بارىسىندا جاريالانادى.
استانانىڭ شاڭحاي مەن ليۆەرپۋل سياقتى قالالارمەن قاتار 15 فيناليستىڭ قاتارىنا ەنۋى ەلوردانىڭ جانە جالپى قازاقستاننىڭ حالىقارالىق يميدجىن نىعايتۋعا ىقپال ەتۋى مۇمكىن. مۇنداي مارتەبە قالانىڭ حالىقارالىق دەڭگەيدەگى تانىمالدىعىن ارتتىرىپ، ينۆەستيتسيالار مەن بىلىكتى مامانداردى تارتۋعا، سونداي-اق زاماناۋي قالالىق سەرۆيستەردى ودان ءارى دامىتۋعا مۇمكىندىك بەرەدى.
