استانا - پاۆلودار اۆتوبانىندا جۇرگىزۋشىلەرگە قاتىستى ماڭىزدى وزگەرىس بار

ق ر ىشكى ىستەر مينيسترلىگىنىڭ باسپا ءسوز قىزمەتى Kazinform ءتىلشىسىنىڭ ساۋالىنا بەرگەن جاۋابىندا اۆتوجولدارداعى جىلدامدىق رەجيمىن تەك قىسقى كەزەڭدە تومەندەتۋ تۋرالى شەشىم قابىلدانعانى كورسەتىلگەن.

- قىسقى كەزەڭنىڭ باستالۋىنا جانە جول مەن اۋا رايى جاعدايلارىنىڭ ناشارلاۋىنا بايلانىستى جول-كولىك وقيعالارىنىڭ جيىلەۋىنە وراي حالىقارالىق جانە رەسپۋبليكالىق ماڭىزى بار بارلىق اۆتوموبيل جولدارىندا جىلدامدىق رەجيمىن تەك قىسقى كەزەڭگە تومەندەتۋ تۋرالى شەشىم قابىلدانادى، - دەلىنگەن جاۋاپتا.

مينيسترلىك وكىلدەرىنىڭ ايتۋىنشا، اۆتوكولىك جولدارىندا جىلدامدىقتى شەكتەۋ ادام ولىمىنە سەبەپ بولاتىن جول-كولىك وقيعالارىنىڭ سانىن ازايتۋعا جانە الدىن الۋعا مۇمكىندىك بەرەدى. دەگەنمەن ناقتى ناتيجە جولدىڭ جاعدايىنا، قوزعالىس قارقىندىلىعىنا، اۋا رايىنا جانە بەلگىلەنگەن جىلدامدىقتىڭ ساقتالۋىنا بايلانىستى.

- استانا - پاۆلودار باعىتى بويىنشا اۆتوجولدا جىلدامدىق رەجيمىنىڭ ساعاتىنا 110 شاقىرىمعا تومەندەتىلۋى تۋرالى الدىن الا اقپارات قۇرالدارى مەن الەۋمەتتىك جەلىلەر ارقىلى حابارلانادى، ءبىراق جىلدامدىق رەجيمىن تومەندەتۋ بىلتىرعىداي تۇراقتى ەنگىزىلمەيدى. ول تەك اۋا رايىنىڭ وزگەرۋىنە بايلانىستى عانا قولدانىلادى، - دەپ كورسەتىلگەن جاۋاپتا.

وسىلايشا، جول ءجۇرىسى قاعيدالارىنىڭ 5-تارماعىنىڭ 2) تارماقشاسىنا سايكەس، جىلدامدىق رەجيمى ۋاقىتشا وزگەرگەن ۋاقىتتا جول جۇرىسىنە قاتىسۋشىلار جول ءجۇرىسىن رەتتەۋ ءۇشىن قولدانىلاتىن رەتتەۋشى مەن باعدارشام سيگنالدارىنىڭ، جول بەلگىلەرىنىڭ جانە جول تاڭبالارىنىڭ تالاپتارىن ورىنداۋعا مىندەتتى بولادى.

ەسكە سالا كەتەيىك، بىلتىر 9-اقپاننان استانا - پاۆلودار اۆتوبانىندا جىلدامدىق رەجيمى تومەندەتىلگەن ەدى.

سونداي-اق استانا - پاۆلودار تاسجولىنىڭ بيىل جوندەلىپ جاتقان بولىگى قاشان تولىق اشىلاتىنىن جازعانبىز.