استانا، الماتى جانە قوسشىدا اۋە تاكسيى پايدا بولادى

بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ ايتتى، دەپ حابارلايدى kznews.kz.

ءمينيستردىڭ سوزىنشە، قازاقستاندا ۇشقىشسىز ۇشۋ اپپاراتتارى مەن تومەن بيىكتىكتە ۇشاتىن كولىك تۇرلەرىن دامىتۋ جۇمىستارى ءجۇرىپ جاتىر. الماتىدا تاۋارلارعا دروندار ارقىلى جەتكىزۋ بويىنشا پيلوتتىق جوبا دا ىسكە قوسىلعان.

جوسپارعا سايكەس، 2027-جىلى دروندارمەن كوممەرتسيالىق تاسىمالدى ىسكە قوسۋ جانە جەتكىزۋ قىزمەتىنىڭ اۋقىمىن كەڭەيتۋ كوزدەلگەن. ال 2028-جىلدان باستاپ اەروتاكسيمەن كوممەرتسيالىق جولاۋشى تاسىمالىن باستاۋ جوسپارلانىپ وتىر.

ماديەۆ ءار كەزەڭدە باستى نازار قاۋىپسىزدىك تالاپتارى مەن قاجەتتى ينفراقۇرىلىمنىڭ دايىندىعىنا اۋدارىلاتىنىن اتاپ ءوتتى.

اەروتاكسي قانشا تۇرادى؟

اۋە تاكسي قىزمەتىنىڭ ناقتى باعاسى ازىرگە بەلگىسىز. جاساندى ينتەللەكت ۆيتسە-ءمينيسترى باحتيار مۇحامەتقاليەۆتىڭ ايتۋىنشا، تاريف پيلوتتىق جوبانىڭ ناتيجەسىنە قاراي انىقتالادى.

«قازىرگى ۋاقىتتا ەلىمىزدە ارنايى پيلوتتىق جوبا جۇزەگە اسىرىلىپ جاتىر. اۋە تاكسيلەرىنىڭ ناقتى تاريفتىك ساياساتى وسى سىناق جوباسىنىڭ ناتيجەلەرى بويىنشا بەكىتىلەدى. ەڭ الدىمەن قاجەتتى ينفراقۇرىلىمدى قالىپتاستىرىپ، ۇشۋ قاۋىپسىزدىگى مەن تاسىمالدى رەتتەيتىن نورماتيۆتىك-قۇقىقتىق بازانى ازىرلەۋ ماڭىزدى»، - دەدى ول.

ايتا كەتەيىك، 2026-جىلدىڭ مامىرىندا الاتاۋ قالاسىندا قازاقستانداعى العاشقى اەروتاكسي سىناقتان وتكەن. سىناققا قىتايدىڭ AutoFlight كومپانياسى شىعارعان جولاۋشىلارعا ارنالعان eVTOL اپپاراتى قولدانىلدى. اۋە كولىگى التى ادامعا ەسەپتەلگەن: بەس جولاۋشى جانە ءبىر ۇشقىش. اپپاراتتىڭ ەڭ جوعارى جىلدامدىعى ساعاتىنا 200 شاقىرىمعا دەيىن، ال ءبىر رەت ۇشقاندا شامامەن 200 شاقىرىمعا دەيىنگى قاشىقتىقتى ەڭسەرۋگە قاۋقارلى.