داستان ساتپايەۆ قاشان 90 مينۋت ويناۋعا دايىن بولادى
استانا. KAZINFORM - اعىلشىندىق «بەرنلي» كلۋبىنىڭ باس باپكەرى نيكي حايەن قازاقستاندىق شابۋىلشى داستان ساتپايەۆتىڭ جاراقاتتان كەيىنگى جاعدايى مەن الاڭعا تولىق ورالۋ جوسپارى تۋرالى ايتتى، دەپ حابارلايدى INFORMSPORTS.
18 جاستاعى قازاقستاندىق فۋتبولشى ساننىڭ ارتقى بۇلشىقەتىنەن العان جاراقاتىنان كەيىن بىرتىندەپ ويىن بابىنا كەلىپ جاتىر.
ساتپايەۆ «ۋوتفوردقا» قارسى كەزدەسۋدە الاڭعا قوسالقى قۇرامنان شىعىپ، 20 مينۋت وينادى. كەيىن فۋتبولشىنىڭ ترانسفەرلىك قۇقىعىنا يە لوندوندىق «چەلسي» كلۋبى ونىڭ «چارلتونعا» قارسى ماتچقا قاتىسۋىنا رۇقسات بەرمەدى.
ال «ۆۋلۆەرحەمپتونمەن» وتكەن كەزدەسۋدە قازاقستاندىق شابۋىلشى شامامەن 30 مينۋت وينادى. بۇل ماتچتا «بەرنلي» 1:2 ەسەبىمەن جەڭىلىس تاپتى.
نيكي حايەن ساتپايەۆتىڭ كوماندا ءۇشىن ماڭىزدى ويىنشى ەكەنىن اتاپ ءوتتى.
«داستان جاراقات الدى. «ۆۋلۆەرحەمپتونعا» قارسى كەزدەسۋدە ول 30 مينۋت ويناي الدى. ونىڭ جىلدامدىعى جوعارى، قارقىنى جاقسى، ەنەرگياسى مول جانە جەكە شەبەرلىگى ەرەكشە. سوندىقتان ول ءبىزدىڭ كوماندا ءۇشىن وتە ماڭىزدى فۋتبولشى»، - دەدى حايەن Burnley Express باسىلىمىنا.
باس باپكەر قازاقستاندىق شابۋىلشىنىڭ الداعى ۋاقىتتا ويىن ۋاقىتىن كەزەڭ- كەزەڭىمەن ارتتىرۋدى جوسپارلاپ وتىرعانىن جەتكىزدى.
«ول ەندى 30 مينۋتتان كوبىرەك ويناي الادى دەپ ۇمىتتەنەمىن. الدىمەن 45 مينۋت، كەيىن 60 مينۋت وينايدى. سودان سوڭ تولىق 90 مينۋت وتكىزۋگە دايىن بولادى دەپ ويلايمىن»،-دەدى مامان.
حايەننىڭ ايتۋىنشا، سوڭعى كەزدەسۋدە ساتپايەۆقا ويىنعا بىردەن ارالاسىپ كەتۋ وڭاي بولماعان. اسىرەسە كوماندا جەڭىلىپ جاتقان ساتتە قىسىم كۇشەيىپ، فۋتبولشىنىڭ ءوز مۇمكىندىگىن تولىق كورسەتۋى قيىنداي تۇسەدى.
سوعان قاراماستان، «بەرنلي» باپكەرى جاس قازاقستاندىقتىڭ الەۋەتىنە سەنىم ءبىلدىرىپ، ونىڭ الداعى ماتچتاردا ءوز شەبەرلىگىن كورسەتەتىنىنە كۇمان كەلتىرمەيتىنىن ايتتى.
«بەرنلي» كەلەسى كەزدەسۋىن سىرت الاڭدا «لينكولن سيتيگە» قارسى وتكىزەدى. بۇل ماتچتا داستان ساتپايەۆتىڭ الاڭداعى ۋاقىتى ۇلعايۋى مۇمكىن. الايدا ازىرگە قازاقستاندىق شابۋىلشى تولىق 90 مينۋت ويناۋعا دايىن ەمەس.
ايتا كەتەلىك «بەرنلي» باپكەرى داستان ساتپايەۆقا قاتىستى «چەلسيدىڭ» شەشىمىنە نارازىلىق بىلدىرگەن ەدى.
