اسقار جۇمادىلدايەۆ باسقاراتىن «ءال-ءجابردىڭ اتاسى» جۋرنالى وزبەكشە جارىق كوردى
تاشكەنت. KAZINFORM - قازاقستاندا شىعاتىن ماتەماتيكا باعىتىنداعى «ءال-ءجابردىڭ اتاسى» عىلىمي-تانىمدىق جۋرنالى وزبەك تىلىندە جارىق كوردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
«ءال-ءجابردىڭ اتاسى» جۋرنالى بىلتىر قاراشا ايىندا قازاقستاندا جارىققا شىقتى. ونىڭ باس رەداكتورى - تانىمال ماتەماتيك، ق ر ۇلتتىق عىلىم اكادەمياسىنىڭ ۆيتسە-پرەزيدەنتى اسقار جۇمادىلدايەۆ.
باسىلىم نەگىزىنەن بالالارعا ارنالعان. ونىڭ قازاق تىلىندەگى العاشقى سانى 2 مىڭ دانامەن جاريالانعان.
كەيىن وعان شەت مەملەكەتتەردەن قىزىعۋشىلىق ارتىپ، ونى وزگە تىلدەردە باسىپ شىعارۋ ءىسى قولعا الىندى. اتاپ ايتقاندا، جۋرنال العاش رەت وزبەك تىلىنە اۋدارىلىپ، تاياۋدا تاشكەنت قالاسىندا وقىرمان نازارىنا تانىستىرىلدى.
«بۇل جۋرنالدى شىعارۋعا دەمەۋشى بولعان - مەنىڭ ستۋدەنتتەرىم. كەزىندە ولار مەنەن ماتەماتيكا بويىنشا بىرنەشە كەڭەس سۇراعان ەدى. سول كەزدە بىلەر اقىلىمدى ايتقانمىن، سول ناتيجەلى بولسا كەرەك، قازىر ول ستۋدەنتتەرىم ۇلكەن جەتىسىككە جەتىپ جاتىر. مەنىڭ بايقاۋىمشا، قازاق جانە وزبەك جاستارىنىڭ اراسىندا كوپ ۇقساستىق بار. اتاپ ايتقاندا، وقۋ، ءبىلىم، عىلىم جۇيەسىندە جانە مىنەز-قۇلىقتا ايىرماشىلىق كوپ ەمەس. سونىڭ ناتيجەسىندە بولسا كەرەك، «ءال-ءجابردىڭ اتاسى» جۋرنالىنا قىزىعۋشىلىق وتە جوعارى»، - دەدى اسقار جۇمادىلدايەۆ.
بەلگىلى ماتەماتيك اتالعان جۋرنالدىڭ وزبەك تىلىندەگى نۇسقاسىن وقيتىن جاستاردىڭ قاتارى كوپ بولارىنا سەنىمدى.
«ءبىزدىڭ ماقسات - ۇلى اتالارىمىزدىڭ جولىن جالعاستىرۋ. كەزىندە بۇكىل الەمنىڭ دامۋىنا عالامات ۇلەس قوسقان ورتالىق ازيادان شىققان ەكى ادام بولسا، سونىڭ ءبىرى - ءال-حورەزمي. ول عۇلامادان مىنا ەكى ءسوزى قالدى: الگەبرا جانە الگوريتم. قاراپايىم تەلەفون، تەلەديدار جانە تەحنيكانىڭ وزگە دە تۇرلەرى اۋەلى الگوريتمنەن قۇرالادى»، - دەپ توقتالدى اسقار جۇمادىلدايەۆ.
وزبەكستاندىق عالىمدار بالالاردىڭ ماتەماتيكا عىلىمىن يگەرۋ جولىندا بۇل جۋرنالدىڭ ايتارلىقتاي پايداسى تيەتىنىنە سەنىم بىلدىرۋدە.
بىلىمگە قۇشتار بۇلدىرشىندەردىڭ ساناسىنا سەرپىلىس جاساۋ ماقساتىندا باسىلىمنىڭ مازمۇنىن تەرەڭدەتە ءتۇسۋ ۇسىنىستارى دا ايتىلدى.
ونىڭ ىشىندە قيىن تاقىرىپتاردى ەرەكشە ادىستەرمەن تۇسىندىرۋگە باعىتتالعان ويىنداردى قولدانۋ جوسپارلانىپ وتىر.
«بۇل جۋرنالدىڭ وزبەك تىلىندە جارىق كورۋىن قازاق-وزبەك عالىمدارى اراسىنداعى ءوزارا ىنتىماقتاستىق پەن دوستىقتىڭ جارقىن كورىنىسى دەپ ايتۋعا بولادى. «ءال-ءجابردىڭ اتاسى» جۋرنالىنىڭ شىعۋىنا ەكى ەلدىڭ عىلىم اكادەميالارى، ءتيىستى مينيسترلىكتەرى مەن جاس عالىمدارى قىزىعۋشىلىق ءبىلدىردى، ۇلەس قوستى. الداعى ۋاقىتتا ونىڭ مازمۇنى تەرەڭدەپ، وقىرمانىن جاڭا بىلىممەن سۋسىنداتادى دەگەن ۇمىتتەمىز. بالالاردىڭ ماتەماتيكاعا دەگەن قىزىعۋشىلىعىن ارتتىرۋ ماقساتىندا جۋرنالعا وزگەشە رەڭك بەرۋ تۋرالى پىكىرلەر ايتىلدى. وعان ساي، بۇلدىرشىندەرگە وسى اۋىر عىلىم سالاسىن ءتۇرلى ويىندار ارقىلى جەتكىزۋ جوسپاردا بار»، - دەپ پىكىر قوستى ءور عىلىم اكادەمياسى جاس عالىمدار كەڭەسى ءتوراعاسىنىڭ ورىنباسارى گۋلسانام تيللايەۆا.
«ءال-ءجابردىڭ اتاسى» جۋرنالى وزبەك تىلىندە ايىنا ءبىر رەت شىعارىلادى. ول باستاپقىدا قازاق تىلىندە جارىق كورگەن نۇسقاسىنىڭ اۋدارماسى رەتىندە جۇرەدى.
اۆتور
ءاليحان اسقار
