اسلانبەك شىمبەرگەنوۆكە قيانات جاسادى: قازاقستان بوكس فەدەراتسياسى ح و ك- قا رەسمي جۇگىنبەك
قازاقستان بوكس فەدەراتسياسى ازيا ويىندارىنىڭ جارتىلاي فينالىندا قولا مەدال العان اسلانبەك شىمبەرگەنوۆتىڭ سوڭعى جەكپە-جەگىنە قاتىستى حالىقارالىق وليمپيادا كوميتەتىنە رەسمي جۇگىنىپ، نارازىلىق بىلدىرەتىن بولدى، دەپ حابارلايدى قازاقپارات.

«تورەشىلەردىڭ ازيا ويىندارى تاريحىنداعى ەڭ ادىلەتسىز شەشىمى. قۇرمەتتى جانكۇيەرلەر، الەم چەمپيونى، قازاقستان قۇراماسىنىڭ كاپيتانى اسلانبەك شىمبەرگەنوۆتىڭ جارتىلاي فينال كەزدەسۋىندە تورەشىلەردىڭ وتە ادىلەتسىز شەشىمىنە قاتىستى ورەسكەل وقيعا ورىن الدى. شىمبەرگەنوۆ بۇكىل جەكپە-جەك بويى جاپونيالىق سيەۆون وكازاۆانى سوققىنىڭ استىنا الدى. جۇدىرىقتارى قارسىلاسقا ءدال ءتيىپ جاتتى. بارلىق جاعىنان مىقتىراق ءارى باسىم بولدى. ءبىراق ولار شىمبەرگەنوۆتىڭ قارسىلاسىنىڭ قولىن كوتەردى… حالىقارالىق وليمپيادا كوميتەتى IBA- داعى تورەشىلىككە ءاردايىم شاعىم ءبىلدىرىپ كەلگەن ەدى، ءبىراق حاڭجوۋداعى ازيا ويىندارىنىڭ جارتىلاي فينالىندا بولعان وقيعا تىم شەكتەن شىعىپ كەتتى» دەپ كەلتىرەدى بوكس فەدەراتسياسى پرەزيدەنتى كەڭەس راقىشەۆتىڭ پىكىرىن ۇيىمنىڭ Instagram پاراقشاسى.

وسىعان بايلانىستى قازاقستان بوكس فەدەراتسياسى ازيا ويىندارى بويىنشا ح و ك تورەشىسىنە ءوز تالاپتارىن رەسمي تۇردە بىلدىرەدى.
«بۇل رەتتە تۋرنيردىڭ ەڭ مىقتى بوكسشىلارى ءبىزدىڭ بىلعارى قولعاپ شەبەرلەرىمەن بىردەي جەرەبەگە ءتۇسۋى، جالپى جەرەبەنىڭ وتكىزىلۋ رەتى، تورەشىلەردىڭ جۇمىسىنا سۇراقتار تۋىنداتتى. ال جەرگىلىكتى بوكسشىلارعا «قىزىل كىلەم» توسەلدى… ح و ك قامقورلىعىنداعى تۋرنيرلەردە تورەشىلەر شەشىمىنە نارازىلىق پەن شاعىم بەرۋگە بولمايدى. قازاقستان - بوكس دەرجاۆاسى، بوكستىڭ كوشباسشىسى رەتىندە رينگتەگى مۇنداي ادىلەتسىزدىك فاكتىلەرىمەن كەلىسە المايدى. مەن ءوز تاراپىمنان اسلانبەك شىمبەرگەنوۆكە جەكە قولداۋ بىلدىرەمىن! مۇنداي فاكتىلەر كاپيتانىمىزدى سىندىرمايدى، ەڭسەسىن تۇسىرمەيدى دەپ سەنەمىن جانە ول بوكستان ەڭ ماڭىزدى حالىقارالىق تۋرنيرلەردە قازاقستان تۋىن بيىكتە جەلبىرەتەدى دەپ ويلايمىن» دەپ اتاپ ءوتتى كەڭەس راقىشەۆ.
ەسكە سالا كەتەيىك، بۇگىن اسلانبەك شىمبەرگەنوۆتىڭ ازيا ويىندارىندا قولا جۇلدەگەر اتانعانىن حابارلاعان ەدىك.
قازاقستان ۇلتتىق قۇراماسىنىڭ كاپيتانى 71 كەلىگە دەيىن سالماقتا 2021-جىلعى الەم چەمپيونى، جاپونيالىق سيەۆون وكادزاۆامەن قولعاپ ءتۇيىستىردى.