اسلانبەك شىمبەرگەنوۆ پەن ولگا سافرونوۆا پاريج وليمپياداسىنىڭ اشىلۋىندا قانداي كيىممەن شىعادى
استانا. KAZINFORM - تۋريزم جانە سپورت مينيسترلىگى پاريج وليمپياداسىنىڭ اشىلۋ جانە جابىلۋ سالتاناتىندا قازاقستاندىق سپورتشىلار قانداي كيىممەن شىعاتىنىن ايتتى.
«نازارلارىڭىزعا ەرلەر مەن ايەلدەردىڭ پارادتىق كوستيۋمى ۇسىنىلىپ وتىر. ايەلدەردىڭ پارادتىق كوستيۋمى 8 دانا (باسقا تاعاتىن ءتاج ءپىشىندى دوڭگەلەك اكسەسۋار، جەيدە، گالستۋك، پيدجاك، شالبار، يۋبكا، شۇلىق، سپورتتىق اياق كيىم). ەرلەر كوستيۋمى 7 دانا (تاقيا، جەيدە، گالستۋك، شالبار، پيدجاك، شۇلىق، اياق كيىم). پارادتىق كوستيۋمدى سپورتشىلار مەن دەلەگاتسيا وليمپيادا ويىندارىنىڭ اشىلۋى مەن جابىلۋ سالتاناتتارىندا كيىپ شىعادى»، - دەلىنگەن مينيسترلىك مالىمەتىندە.
مينيسترلىكتەگىلەر سپورتشىلاردىڭ كوستيۋمىنە باستىرىلعان ويۋلارعا جەكە توقتالدى.
«ۇلتتىق ويۋلاردىڭ ەلەمەنتتەرى تەك ءسان-سالتانات ءۇشىن باسىلعان جوق، قازاقستاندىقتاردىڭ الەمدى قابىلداۋى مەن ەستەتيكالىق تالعامىنان حابار بەرەتىن تاريحي، سيمۆوليكالىق ءمانى دە بار. «ءمۇيىز» ەرلىك پەن قورعانىشتىڭ، كۇشتىڭ سيمۆولى. «قوس ءمۇيىز» ءمۇيىز ەلەمەنتى بەينەلەيتىن ۇعىمداردى بىرلىكپەن، ۇيلەسىممەن ۇشتاستىرادى. «قاز مويىن» سپورتتاعى يكەم مەن ەپتىلىكتى، اسەمدىكتى بەينەلەيدى»، - دەپ جازىلعان مينيسترلىك اقپاراتىندا.
