اسكەرىمىز «گيبريدتى سوعىستارعا» دايىن با
قورعانىس مينيسترلىگىنىڭ ماماندارى قارۋلى كۇشتەردى الەمدە تەندەنتسيا الىپ كەلە جاتقان گيبريدتى سوعىستارعا دايىنداۋ جۇمىستارى قالاي ۇيىمداستىرىرىلىپ جاتقانىن ءمالىم ەتتى، دەپ حابارلايدى Kazinform اگەنتتىگى.
«قارۋلى كۇشتەردە اسكەرگە اقپاراتتىق-پسيحولوگيالىق جانە كيبەر شابۋىل ارقىلى اسەر ەتۋ ارەكەتتەرىنە توتەپ بەرۋگە ارنالعان بولىمشەلەر قۇرىلدى. قازىر وسى الەۋەت پەن مۇمكىندىكتەردى ارتتىرۋ باعىتىندا جۇمىس جۇرگىزىلىپ جاتىر. قارسىلاستار «گيبريدتى» تاسىلدەر قولدانعان جاعدايدا مەملەكەتتىڭ اسكەري ۇيىمدارىنىڭ قۇرامىنا كىرەتىن ورگاندار مەن ۇيىمدار ساياسي-ديپلوماتيالىق، ەكونوميكالىق، قۇقىقتىق، اقپاراتتىق، يدەولوگيالىق باعىتتاعى بايىپتى شارالار قولدانادى. سونداي-اق، قازاقستان رەسپۋبليكاسىندا تۇراقسىزدىق ورناتۋعا باعىتتالعان وزگە دە اسكەري ەمەس تاسىلدەرگە جاۋاپ قاتادى»، - دەپ جازىلعان مينيسترلىك رەداكسيا ساۋالىنا جولداعان جاۋابىندا.
سونداي-اق، جاۋاپتى ارنايى وپەراتسيالاردى وتكىزۋ ماسەلەلەرىن پىسىقتاۋ كەزىندە ءتۇرلى اسكەري بولىمشەلەردىڭ قاناتتاسىپ جۇمىس ىستەۋىن شىڭداي تۇسۋگە كوڭىل بولىنەتىنى ايتىلعان.
«وسى اتالعان وزگەرىستەردىڭ ءبارى قارۋلى كۇشتەردىڭ جەكە قۇرامىنىڭ اسكەري قابىلەت دەڭگەيىن كوتەرۋگە، قولداعى كۇش پەن قۇرالدى ءتيىمدى قولدانۋعا ۇيرەتۋگە كەڭ مۇمكىندىكتەر بەرەدى»، - دەلىنگەن رەسمي جاۋاپتا.
