اسكەريلەر نارازىلىق بىلدىرگەن فەرمەرلەرگە كوزدەن جاس اعىزاتىن گاز اتتى

استانا. KAZINFORM - نيۋ-دەليگە قاراي بەت العان نارازى ۇندىلىك فەرمەرلەر قاۋىپسىزدىك كۇشتەرىمەن ەكىنشى كۇننەن بەرى قاقتىعىسىپ جاتىر، دەپ حابارلايدى Reuters.

سەيسەنبى كۇنى تاڭەرتەڭ فەرمەرلەر كاسىپوداق جەتەكشىلەرى مەن ۇكىمەت اراسىنداعى ءبىرقاتار اۋىلشارۋاشىلىق داقىلدارىنىڭ ەڭ تومەنگى باعاسى تۋرالى شەشىمگە كەلە الماعان كەلىسسوزدەردەن كەيىن فەرمەرلەر نارازىلىق شەرۋىن باستادى.

قاۋىپسىزدىك كۇشتەرى شەرۋشىلەردى پەندجاب پەن حاريانانى ءبولىپ تۇرعان شامبۋ شەكاراسىندا توقتاتتى.

حاريانا پوليتسياسى وكىلىنىڭ حابارلاۋىنشا، بۇگىندە كوزدەن جاس اعىزاتىن گاز قولدانىلىپ، بۇل شارا جاعداي باقىلاۋعا الىنعانشا جالعاسادى.

«ءبىز پرەمەر-ءمينيستردىڭ فەرمەرلەرمەن بايلانىسقا شىعىپ، سويلەسكەنىن قالايمىز»، - دەدى ۇندىلىك ANI اقپارات اگەنتتىگىنە Punjab Kisan Mazdoor Sangharsh كوميتەتىنىڭ باس حاتشىسى سارۆان سينگح پاندەر.

وسى ارادا ۇكىمەت فەرمەرلەرگە كەلىپ، ماسەلەنى تالقىلاۋدى سۇرادى.

«ءبىز فەرمەرلەر كاسىپوداقتارىمەن سىندارلى جانە وڭ ديالوگ قۇرۋ ءۇشىن كۇش سالۋدى جالعاستىرامىز»، - دەدى سارسەنبى كۇنى ەلدىڭ اۋىل شارۋاشىلىعى ءمينيسترى اردجۋن مۋندا تىلشىلەرگە.

ANI تۇسىرگەن فوتوسۋرەتتەرىنەن نيۋ-دەليمەن شەكتەسەتىن باسقا ايماقتاردا بارريكادالار، سىم تورمەن قاپتالعان سەمەنت بلوكتارى، بوس كونتەينەرلەر جانە باسقا دا كەدەرگىلەر سياقتى قاتاڭ قاۋىپسىزدىك شارالارىن كورۋگە بولادى.

بۇعان دەيىن حابارلانعانداي، ءۇندىستان پوليتسياسى 2021-جىلى ۋادە ەتىلگەن ءونىم باعاسىن كوتەرۋدى تالاپ ەتىپ، نيۋ-دەليگە جەتۋدى جوسپارلاعان فەرمەرلەردىڭ قوزعالىسىن توقتاتۋ ءۇشىن جولداردى جاۋىپ تاستادى.