اسكەري ىنتىماقتاستىقتىڭ پەرسپەكتيۆاسى تالقىلاندى - مينيسترلىك
استانا. KAZINFORM - قازاقستان قورعانىس ءمينيسترى گەنەرال- پولكوۆنيك رۋسلان جاقسىلىقوۆتىڭ باسشىلىعىمەن قازاقستاندىق دەلەگاتسيا يتاليانىڭ قورعانىس ۆەدومستۆوسى مەن اسكەري نىساندارىن ارالادى.
ساپار اياسىندا گەنەرال-پولكوۆنيك رۋسلان جاقسىلىقوۆ يتاليانىڭ قورعانىس ءمينيسترى گۆيدو كروزەتتومەن كەزدەستى. تاراپتار ەكىجاقتى اسكەري ىنتىماقتاستىقتىڭ نەگىزگى ماسەلەلەرىن، ونىڭ ىشىندە اسكەري ءبىلىم بەرۋ، جاۋىنگەرلىك دايىندىق جانە بىتىمگەرلىك قىزمەتتى تالقىلادى.
گەنەرال-پولكوۆنيك رۋسلان جاقسىلىقوۆ حالىقارالىق ارەنادا قازاقستان ءۇشىن بىتىمگەرلىك قىزمەتتىڭ ماڭىزدىلىعىن اتاپ ءوتتى. ول قازاقستاندىق وفيتسەرلەردىڭ «ب ۇ ۇ- نىڭ ليۆانداعى ۋاقىتشا كۇشتەرى» ميسسياسىنا، يتاليا كونتينگەنتىنىڭ قۇرامىندا تابىستى ىنتىماقتاستىقتىڭ ۇلگىسى رەتىندە قاتىسۋىنىڭ ماڭىزدىلىعىن اتاپ ءوتتى.
كەلىسسوزدەر قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتى مەن يتاليا قارۋلى كۇشتەرى باس شتابىنىڭ جوعارى قورعانىس زەرتتەۋلەرى ورتالىعى اراسىنداعى ءوزارا ءىس-قيمىل ءۇشىن جاڭا مۇمكىندىكتەر اشاتىن اكادەميالىق ىنتىماقتاستىق جانە عىلىمي زەرتتەۋلەر تۋرالى مەموراندۋم جاساسۋمەن اياقتالدى.
ساپار اياسىندا دەلەگاتسيا سونىمەن قاتار پراتيكا-دي- مارە تەڭىز اۆيابازاسىنا جانە يتالياندىق اۋە كۇشتەرىنىڭ اسكەري اۋەجايىنا باردى. مۇندا ەڭ ءىرى يتالياندىق «Leonardo» كورپوراتسياسىنىڭ وكىلدەرى جاۋىنگەرلىك تىكۇشاقتار مەن C4I اسكەرلەرىن باسقارۋدىڭ اۆتوماتتاندىرىلعان جۇيەسىنىڭ جۇمىس ىستەۋىن قامتاماسىز ەتەتىن باعدارلامالىق قۇرالداردى كورسەتتى.
قازاقستاندىق دەلەگاتسيا ريمنەن 119 شاقىرىم جەردە ورنالاسقان «اكۋيلا» تاۋ دايىندىعى بازاسىندا دا بولدى. مۇندا ولار يتاليا قۇرلىق اسكەرلەرى ءالپى پولكىنىڭ ينفراقۇرىلىمىمەن، جابدىقتارىمەن جانە اسكەري قىزمەتشىلەردى وقىتۋ باعدارلاماسىمەن تانىستى.
ەسكە سالا كەتەيىك 17 مىڭ اسكەري قىزمەتشىگە «كرەديتتىك دەمالىس» بەرىلەتىنى تۋرالى جازعان ەدىك.
