اسكەري گوسپيتالدە ءۇش ماڭىزدى ۋرولوگيالىق وتا جاسالدى
استانا. KAZINFORM - وپەراتسيالار ق ر قورعانىس مينيسترلىگىنىڭ باس اسكەري كلينيكالىق گوسپيتالىندە جاسالىپ، YouTube پلاتفورماسىندا ونلاين رەجيمدە كورسەتىلدى. بۇل تۋرالى قورعانىس مينيسترلىگىنىڭ باسپا ءسوز قىزمەتى مالىمدەدى.
وتانىڭ بارىسىن قازاقستاننىڭ ءار وڭىرىنەن، تاياۋ شەت ەلدەردەن كەلگەن دارىگەرلەر، سونداي-اق «استانا» مەديتسينا ۋنيۆەرسيتەتىنىڭ ستۋدەنتتەرى باقىلاپ وتىردى. ونلاين-كونفەرەنسياعا قاتىسۋشىلار وپەراتسيالار پروتسەسىمەن ەگجەي-تەگجەيلى تانىسۋعا، سۇراقتار قويۋعا جانە وعان تىكەلەي ەفير ارقىلى جاۋاپ الۋعا مۇمكىندىگى بولدى.
لازەرلىك جابدىقتى قولدانا وتىرىپ، جوعارى مامانداندىرىلعان ۋرولوگيالىق وپەراتسيانى مەديتسينا عىلىمدارىنىڭ كانديداتى، س. پ. بوتكين اتىنداعى ماسكەۋ قالالىق كلينيكالىق اۋرۋحاناسىنىڭ جوعارى ساناتتى ۋرولوگ دارىگەرى رومان اندرەيەۆ جاسادى. وتا جاساۋ ءۇشىن رەسەيلىك حيرۋرگ وزىمەن بىرگە قازاقستاندا بالاماسى جوق يتالياندىق لازەرلىك اپپارات كەشەنىن الىپ كەلدى. دارىگەردىڭ تاجىريبەسىندەگى ەڭ جاسى ۇلكەن پاتسيەنت 103 جاستاعى قاريا ەكەنىن اتاپ ءوتتى. ال بۇگىنگى پاتسيەنت نەبارى 70 تە.
- ناۋقاسقا قۋىق استى بەزىنىڭ قاتەرسىز ادەنوماسىنا وپەراتسيا جاسالدى. ۇيىمداستىرۋشىلار تاجىريبە الماسۋ ءۇشىن بارلىق جاعداي جاساۋعا تىرىستى. ءبىز كەڭ سپەكتردە قولدانىلاتىن يتالياندىق لازەرلىك جابدىقتىڭ جۇمىسىن كورسەتتىك. بۇنى نەيروحيرۋرگيادا، حيرۋرگيادا جانە گينەكولوگيادا قولدانۋعا بولادى، - دەپ ءتۇسىندىردى رومان اندرەيەۆ.
لاپاروسكوپيالىق پلاستيكا بويىنشا ەكىنشى وپەراتسيانى جوعارى ساناتتى ۋرولوگ-دارىگەر، ۇلتتىق عىلىمي مەديتسينالىق ورتالىعى ۋرولوگيا ءبولىمىنىڭ اعا ورديناتورى رۋستام وماربايەۆ جاسادى.
ءۇشىنشىسىن رەتروگرادتىق ينترارەنالدى حيرۋرگيا بويىنشا اسكەري گوسپيتال ۋرولوگيا ءبولىمىنىڭ باستىعى مەديتسينا قىزمەتىنىڭ پودپولكوۆنيگى داستان كەنجەراحمانوۆ باسقاردى.
«بۇل تۇرعىدا ونىڭ ءبىراز تاجىريبەسى بار. وتكەن جىلدىڭ جازىندا قازاقستاندا العاش رەت اسكەري حيرۋرگ ۋروليتيازبەن اۋىراتىن ناۋقاستىڭ ەكى بۇيرەگىنەن بىردەن تاستاردى الىپ تاستاۋ ءۇشىن كۇردەلى وپەراتسيا جاسادى. سول كەزدە بۇكىل مەديتسينالىق پروتسەدۋرا دا ونلاين رەجيمىندە كورسەتىلگەن»، - دەلىنگەن حابارلامادا.
باس اسكەري كلينيكالىق گوسپيتال باستىعى مەديتسينالىق قىزمەت پولكوۆنيگى عابيدەن ايداروۆ اتاپ وتكەندەي، فورۋمنىڭ نەگىزگى ماقساتى - ۋرولوگيا جانە اندرولوگيا سالاسىنداعى جاڭا تەحنولوگيالارمەن قازاقستاننىڭ ءارتۇرلى وڭىرلەرى مەن تاياۋ شەت ەلدەردىڭ جاس جانە تاجىريبەلى دارىگەرلەرىمەن تاجىريبە الماسۋ.
- كونفەرەنسيا وتكىزۋ - ۋرولوگيانى دامىتۋداعى ماڭىزدى قادام. ول عىلىم مەن پراكتيكا اراسىنداعى بايلانىستى قولداۋعا باعىتتالعان، بۇل، ءسوزسىز، عىلىمي مەديتسينالىق زەرتتەۋلەر پروتسەسىن جاقسارتۋعا ۇلەس قوسادى جانە مامانداردى ودان ءارى جەمىستى جۇمىس ىستەۋگە ىنتالاندىرادى، - دەدى گ. ايداروۆ.
ءوز پىكىرىمەن «استانا مەديتسينا ۋنيۆەرسيتەتى» ك ە ا ق ۋرولوگيا جانە اندرولوگيا كافەدراسىنىڭ مەڭگەرۋشىسى، مەديتسينا عىلىمدارىنىڭ كانديداتى، قاۋىمداستىرىلعان پروفەسسور ۇلانبەك جاڭبىربەك ۇلى دا ءبولىستى. بيىل 60 جىلدىعىن اتاپ وتەتىن ۋنيۆەرسيتەت اسكەري گوسپيتالمەن تىعىز بايلانىستا جۇمىس ىستەيتىنىن اتاپ ءوتتى.
- بۇگىنگى ماستەر-كلاسس ۋرولوگياداعى جاڭا تەحنولوگيالارعا نەگىزدەلگەن. بىزگە جوعارى قۋاتتى لازەر اكەلىندى، ونىڭ كومەگىمەن قۋىق استى بەزىنىڭ ادەنوماسى قان شىعارۋسىز جويىلادى. بۇل اپپاراتتىڭ ارتىقشىلىعى سول، پاتسيەنتتەر قىسقا مەرزىمدە قالپىنا كەلىپ، 2-3 تاۋلىككە ستاتسيوناردان شىعارىلادى، - دەپ ناقتىلادى ۇ. جاڭبىربەك ۇلى.
اتالمىش شارا «ۋرولوگياداعى زاماناۋي لازەرلىك تەحنولوگيالار» تاقىرىبى بويىنشا مامانداردىڭ پىكىر الماسۋىمەن اياقتالدى.
