اسكەري سوت داۋلەت تۇرلىحانوۆتىڭ ۇلىنا قاتىستى ءىستى قايتا قارادى

ق ر اسكەري سوتىنىڭ قىلمىستىق ىستەر جونىندەگى سوت القاسى بۇزاقىلىق نيەتپەن ەكى ادامنىڭ دەنساۋلىعىنا قاساقانا ورتاشا اۋىرلىقتاعى زيان كەلتىرگەن اسكەري قىزمەتشى نۇراسىل بولاتقا قاتىستى قىلمىستىق ءىستى اپەللياتسيالىق تارتىپتە قارادى.

بۇل جايىندا اتالعان سوتتىڭ باسپا ءسوز قىزمەتىنەن ءمالىم ەتتى، دەپ حابارلايدى Kazinform.

ءبىرىنشى ساتى ۇكىمىمەن نۇراسىل بولاتقا 500 ا ە ك - 17125000 تەڭگە مولشەرىندە ايىپپۇل سالىنعان بولاتىن. زارداپ شەگۋشىلەردىڭ پايداسىنا 1 ميلليون تەڭگە مولشەرىندە مورالدىق وتەماقى ءوندىرىلىپ الىندى.

سوت ايىپتالۋشى ن. بولات بيىلعى 11- اقپاندا ساعات 02.00 شاماسىندا «ەۆا» تۇنگى كلۋبىنىڭ جانىندا بۇزاقىلىق نيەتپەن جابىرلەنۋشى ەرلى-زايىپتى چ. -لارعا قاساقانا ورتاشا اۋىرلىقتاعى دەنە جاراقاتىن كەلتىرگەنىن انىقتادى.

سوتتالۋشىنىڭ كىناسى ءوزى مويىنداعان ايعاقتارىمەن، جابىرلەنۋشىلەر مەن كۋاگەرلەردىڭ ايعاقتارىمەن، ساراپتاما قورىتىندىسىمەن، وقيعا بولعان جەردى تەكسەرۋ حاتتامالارىمەن دالەلدەندى.

قىلمىستىق ىستەر جونىندەگى سوت القاسىنىڭ قاۋلىسىمەن ۇكىم مەملەكەتتىك باج سوماسى بولىگىندە 1725 تەڭگەگە دەيىن تومەندەتىلدى. سونىمەن قاتار سوتتالۋشىدان زارداپ شەگۋشىنىڭ پايداسىنا وكىلىنىڭ اپەللياتسيالىق ساتىدا سوتقا قاتىسقان قىزمەتىنە تولەگەن 400 مىڭ تەڭگە شىعىنى ءوندىرىلىپ الىندى. ۇكىمنىڭ قالعان بولىگى وزگەرىسسىز قالدى.

قاۋلى زاڭدى كۇشىنە ەندى.

ەسكە سالا كەتەيىك، بيىل اقپاندا ن. بولات الماتىدا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىققان ەدى.

وسى جىلدىڭ قازانىندا الماتى قالالىق اسكەري سوتىنىڭ ۇكىمىمەن نۇراسىل بولات ق ك 107-بابىنىڭ 2-بولىگى 1 جانە 5-تارماقتارىندا كوزدەلگەن قىلمىس جاساعانى ءۇشىن كىنالى دەپ تانىلىپ، وعان جازا تۇرىندە 1 ميلليون 700 مىڭ تەڭگە ايىپپۇل تاعايىندالعان بولاتىن.