اسكەري ءتارتىپتى بۇزعان ساربازدار جاساندى ينتەللەكت ارقىلى انىقتالادى
استانا. KAZINFORM - اسكەري ءتارتىپتى بۇزعان نەمەسە اسكەري جارعى تالاپتارىن ورىنداماعان ساربازدار جاساندى ينتەللەكت ارقىلى انىقتالادى.
بۇل تۋرالى ق ر قورعانىس ءمينيسترىنىڭ ورىنباسارى دارحان احمەديەۆ ءمالىم ەتتى.
«جاساندى ينتەللەكت تەحنولوگياسى اياسىندا بەينەجازباعا تالداۋ جاساۋ جۇيەسىن ەنگىزۋدىڭ قاناتقاقتى جوباسى ىسكە اسىرىلىپ جاتىر. بۇل جوبا ارقىلى اسكەري وبەكتىنىڭ قاۋىپسىزدىگى مەن قورعانىس قابىلەتىن قامتاماسىز ەتۋ، بوگدە ادامداردى انىقتاۋ، اۆتوكولىك ءنومىرىن تانۋ، ادامدار توپتالىپ جينالا باستاعانىن انىقتاۋ، قارۋ ساقتاۋ بولمەسىندە باقىلاۋدى كۇشەيتۋ، اسكەري وبەكتى مەن قويمالاردىڭ پەريمەترىن قورعاۋ قامتاماسىز ەتىلەدى»، - دەدى د. احمەديەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
بۇل تۇرعىدا تىلشىلەر اسكەري بولىمدەردەگى دارەتحاناعا جاقىن ورنالاسقان دالىزدەردە قوسىمشا بەينەكامەرالار ورناتۋ مۇمكىندىگى تۋرالى سۇراق قويدى. «اسكەردەگى ءتارتىپتى بۇزۋ ارەكەتتەرى ءجيى بولىپ جاتاتىن ورىنداردا قوسىمشا كامەرالار ورناتىلا ما؟» دەپ سۇرادى تىلشىلەر.
ءوز كەزەگىندە دارحان احمەدييەۆ بەينەكامەرامەن قامتىلعان اۋماقتارعا قاتىستى ءتيىستى زەرتتەۋ ءجۇرىپ جاتقانىن ايتتى. بۇل رەتتە اسكەري پوليتسيامەن بىرلەسە قوسىمشا كامەرالار ورناتىلاتىن ورىندار ايقىندالىپ جاتىر.
«ءتيىستى بۇيرىققا وزگەرىس ەنگىزىلىپ، وسىنى اسكەري بولىمشەلەردە ورىنداۋ مىندەتتەلەدى. ءبىز بەينەكامەرالار مەن تەحنيكالىق قاۋىپسىزدىك قۇرالدارىن ساتىپ الۋدى ورتالىقسىزداندىردىق. قازىر اسكەري ءبولىم جوعارى تۇرعان ورگانعا قاراماستان ءوز بەتىنشە قاجەت ينفراقۇرىلىم جابدىقتارىن ساتىپ الىپ، جاڭارتا الادى»، - دەدى ءمينيستردىڭ ورىنباسارى.
ونىڭ ايتۋىنشا، جاساندى ينتەللەكت بەينەباقىلاۋ جۇيەسى ارقىلى اسكەردەگى زاڭسىزدىقتى انىقتايدى.
«دارەتحانانىڭ ىشىندە ەشكىم كامەرا ورناتپايدى، ءبىراق دالىزدەردە كامەرالار بولادى. سونىمەن قاتار بارلىق ءتۇسىرىلىپ جاتقان بەينەجازبانى زەرتتەۋ ءۇشىن جاساندى ينتەللەكت ەنگىزەمىز. ساربازدار توپتالىپ جينالسا نەمەسە ادامدار بەلگىلى ءبىر ۋاقىت ارالىعىندا نازاردان تىس كورىنبەسە، وندا وسى جۇيە كەزەكشىگە دە، جوعارى تۇرعان ورگاندارعا دا سيگنال بەرەدى. مۇنىمەن قوسا، بۇل جۇيەگە اسكەري پوليتسيا وكىلدەرى قوسىلادى»، - دەدى دارحان احمەديەۆ.
جاقىندا قازاقستان اسكەرىندەگى زاڭسىز ارەكەتتەردى انىقتاۋ ءۇشىن بەينەباقىلاۋ جۇيەسى جاڭارتىلاتىنىن جازعان ەدىك. بەينەباقىلاۋ كامەرالارى جاساندى ينتەللەكت ارقىلى باسقارىلادى.
