اسكەري ازىق-تۇلىك پايىنىڭ قۇنىن ەسەپتەۋ ءتاسىلى وزگەرەدى
استانا. KAZINFORM - ۇكىمەت ارميانىڭ ازىق-تۇلىك پايىنا قۇن تاعايىنداۋدىڭ تاسىلدەرىن وزگەرتۋ جولدارىن پىسىقتاپ جاتىر. ونىڭ ىشىندە ءوز-ءوزىن قامتاماسىز ەتۋ تەتىگى دە زەرتتەلىپ جاتىر.
بۇل تۋرالى پرەمەر-مينيستر ولجاس بەكتەنوۆتىڭ ءماجىلىس دەپۋتاتىنىڭ ساۋالىنا جولداعان جاۋابىندا ايتىلعان.
- قورعانىس مينيسترلىگىنىڭ جانىنان ارنايى قۇرىلعان جۇمىس توبى ازىق-تۇلىك پايىنىڭ قۇنىن ارتتىرۋ جانە ونى ەسەپتەۋ ادىستەمەسىن جەتىلدىرۋ ماسەلەلەرىن قاراستىرىپ جاتىر. بۇل توپتىڭ قۇرامىنا مۇددەلى مەملەكەتتىك ورگاندار مەن ۇيىمداردىڭ (قارجى مينيسترلىگى، ىشكى ىستەر مينيسترلىگى، توتەنشە جاعدايلار مينيسترلىگى، ۇ ق ك، مەملەكەتتىك كۇزەت قىزمەتى، «اتامەكەن» ۇ ك پ) وكىلدەرى كىرەدى.
جۇمىس توبى ازىق-تۇلىك پايىنىڭ قۇنىن قايتا ەسەپتەۋ ماسەلەسىمەن 2023- 2024 -جىلدارداعى ستاتيستيكالىق دەرەكتەردىڭ وزگەرىسىن ەسكەرە وتىرىپ اينالىسىپ جاتىر. سونىمەن قاتار، پايدى ەسەپتەۋ ءتاسىلىن قايتا قاراۋدىڭ ءبىرىڭعاي تاسىلدەرى، ونىڭ ىشىندە ءوزىن-ءوزى قامتاماسىز ەتۋگە كوشۋ مۇمكىندىگى دە قاراستىرىلىپ جاتىر، - دەيدى ولجاس بەكتەنوۆ.
پرەمەر-مينيستر جالپى بۇل ماسەلە مەملەكەتتىڭ قارجىلىق مۇمكىندىكتەرىنە قاراي جەتىلدىرىلەتىنىن ەسكە سالادى.
- بۇعان قوسا، جۇمىس توبى ازىق-تۇلىك پايىنىڭ قۇنىن ينفلياتسيا مەن باعانىڭ وسۋىنە قاراي تۇراقتى تۇزەتىپ وتىراتىن مەحانيزمدى ازىرلەۋ جانە تاماقتاندىرۋدى ۇيىمداستىرۋعا قوعامدىق ۇيىمداردىڭ تاراپىنان باقىلاۋ ورناتۋ ماسەلەلەرىن دە قاراستىرىپ جاتىر.
جاڭا تاسىلدەردى ەنگىزۋ ەلدەگى ەكونوميكالىق جاعدايدىڭ دامۋى مەن رەسپۋبليكالىق بيۋدجەتتىڭ مۇمكىندىكتەرى ەسكەرىلە وتىرىپ جۇزەگە اسىرىلادى، - دەپ جازىلعان جاۋاپتا.
بۇعان دەيىن ولجاس بەكتەنوۆ سەنات دەپۋتاتىنىڭ ساۋالىنا بەرگەن جاۋابىندا قورعانىس ونەركاسىپ كەشەنىن دامىتۋ قورىنىڭ جارعىلىق كاپيتالىن كوبەيتۋ تۋرالى بيۋدجەتتىك ءوتىنىم ازىرلەنگەنىن ءمالىم ەتكەن بولاتىن.
