اسكەرگە SMS ارقىلى شاقىرادى، بارۋ نەمەسە جالتارۋ ءۇشىن بىرەۋگە پارا بەرۋدىڭ قاجەتى جوق

استانا. قازاقپارات – 1-ناۋرىزدا استانادا كوكتەمگى مەرزىمدى اسكەري قىزمەتكە شاقىرۋ باستالدى. ەلوردادان 1 مىڭنان اسا جىگىت اسكەرگە اتتانادى.

بۇل تۋرالى و ك ق بريفينگىندە استانا قالاسى قورعانىس ىستەرى دەپارتامەنتىنىڭ باستىعى ايدىن ساعىنبەكوۆ ايتتى.

2024 -جىلدىڭ 30-ماۋسىمىنا دەيىن قارۋلى كۇشتەردىڭ، باسقا دا اسكەرلەر مەن اسكەري قۇرىلىمداردىڭ قاتارىن اسكەرگە شاقىرۋدى كەيىنگە قالدىرۋعا نەمەسە ودان بوساتۋعا نەگىز جوق.

بيىل اسكەر قاتارىن 18 بەن 27 جاس ارالىعىنداعى جيىرما مىڭنان استام ەر ازامات تولىقتىرادى.

قارۋلى كۇشتەرگە 9000 نان استام ادام،

ۇلتتىق ۇلانعا 6000 نان استام،

ۇ ق ك شەكارا قىزمەتىنە 3000 عا جۋىق،

توتەنشە جاعدايلار مينيسترلىگىنە 300 دەن استام،

مەملەكەتتىك كۇزەت قىزمەتىنە 300 گە جۋىق ادام شاقىرىلادى.

ايدىن ساعىنبەكوۆتىڭ ايتۋىنشا، استانا قالاسىنان 1000 نان استام جىگىت اسكەرگە جىبەرىلەدى.

«مەرزىمدى اسكەري قىزمەتكە شاقىرۋ جانە ونىڭ بەلگىلەنگەن مەرزىمىن وتكەرگەن اسكەري قىزمەتشىلەردى زاپاسقا شىعارۋ قولدانىستاعى زاڭعا سايكەس ۇيىمداستىرىلىپ، جۇرگىزىلەدى. اسكەرگە شاقىرىلۋعا ءتيىستى ەر ازاماتتاردى حاباردار ەتۋ ولاردىڭ تۇرعىلىقتى مەكەنجايىنا نەمەسە جۇمىس ورىندارىنا جەتكىزىلەتىن دەربەس شاقىرتۋ قاعازىن جولداۋ جانە 1414 قىزمەتىنىڭ SMS- حابارلاماسى ارقىلى جۇزەگە اسادى. شاقىرتۋ قاعازى بولادى»، - دەدى ول.

اسكەرگە شاقىرۋدى كەيىنگە قالدىرۋ نەمەسە ودان بوساتۋ ازاماتتارعا ەلەكتروندى ۇكىمەت پورتالى ارقىلى ۇسىنىلادى.

اتالعان قىزمەتتەردى كورسەتۋگە جاۋاپتى جەرگىلىكتى اتقارۋشى ورگاندار بولىپ سانالادى.

«اسكەري قىزمەت - ءاربىر جاس ازاماتتىڭ زاڭمەن بەلگىلەنگەن مىندەتى. ال اسكەري قىزمەت وتكەرۋدەن جالتارۋ بارلىق قۇقىقتىق سالدارعا اكەپ سوقتىراتىن قىلمىستىق جانە اكىمشىلىك جاۋاپكەرشىلىكتى كوزدەيتىنىن ەسكە سالعىم كەلەدى. سونىمەن قاتار اسكەرگە شاقىرۋدى كەيىنگە قالدىرۋ نەمەسە ودان بوساتۋ ماسەلەسىن بەلگىلى ءبىر تولەم ارقىلى شەشۋ جولىمەن كومەك كورسەتۋگە ۋادە بەرەتىن ادامداردىڭ ارەكەتىنەن ازاماتتاردى ساقتاندىرعىم كەلەدى، ويتكەنى بۇل قىزمەتتەردى جەرگىلىكتى اتقارۋشى ورگاندار وتەۋسىز نەگىزدە كورسەتەدى. اتالعان كورسەتىلەتىن مەملەكەتتىك قىزمەتتى كورسەتۋ ءتارتىبى تۋرالى ناقتى اقپاراتتى egov.kz سايتىنان الۋعا نەمەسە ارنايى ازىرلەنگەن جادىنامامەن تانىسۋعا بولادى. ولار بارلىق جەرگىلىكتى اسكەري باسقارۋ ورگانىندا بار»، - دەدى سپيكەر.

اسكەردىڭ بارلىق سالالارىنا سيفرلىق تەحنولوگيانى ەنگىزۋ جالعاسىپ جاتىر.

اسكەري مىندەتتىلەر مەن اسكەرگە شاقىرىلۋشىلاردىڭ ەسەبى جەرگىلىكتى اسكەري باسقارۋ ورگاندارىنىڭ جۇمىسىن اۆتوماتتاندىرۋعا مۇمكىندىك بەرەتىن سيفرلىق فورماتقا اۋىستى.

ازاماتتاردى اسكەري قىزمەتكە شاقىرۋدى كەيىنگە قالدىرۋ جانە بوساتۋ جونىندەگى قىزمەت ىسكە قوسىلدى.

ەندى ازاماتتار اسكەري قىزمەت وتكەرۋ مارتەبەسى تۋرالى مالىمەتتى ۇسىنۋ بويىنشا مەملەكەتتىك قىزمەتتى ءبىر دە ءبىر قۇجاتسىز الا الادى.

ازاماتتاردىڭ بۇل ساناتى شاقىرۋدى كەيىنگە قالدىرۋ تۋرالى SMS-حابارلاما الادى.

بۇل جۇيە ازاماتتاردىڭ اسكەري ەسەبىن سيفرلاندىرۋ جەكە بايلانىسىن قوسپاعاندا، كوپتەگەن ماسەلەنى قاشىقتان شەشۋگە مۇمكىندىك بەرەدى.