اسكەر قاتارىن 20 مىڭنان استام ازامات تولىقتىرادى

استانا. KAZINFORM - اسكەر قاتارىن 20 مىڭنان استام ازامات تولىقتىرادى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە قارۋلى كۇشتەرى باس شتابى باستىعىنىڭ ورىنباسارى گەنەرال-مايور ساكەن ءجۇسىپوۆ ايتتى.

- پرەزيدەنتتىڭ 2025 -جىلدىڭ 13-اقپانداعى  782-جارلىعىنا سايكەس ناۋرىز ايىنان باستاپ جەرگىلىكتى اتقارۋشى ورگان اكىمدەرى ورىنباسارلارىنىڭ باسشىلىق ەتۋىمەن 195 قالالىق جانە اۋداندىق اسكەرگە شاقىرۋ كوميسسياسى ازاماتتاردى كوكتەمگى مەرزىمدى اسكەري قىزمەتكە شاقىرۋعا كىرىستى. ماۋسىم ايىنىڭ وتىزىنا دەيىن قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارىن اسكەرگە شاقىرۋدى كەيىنگە قالدىرۋعا نەمەسە ودان بوساتۋعا نەگىزى جوق، 18دەن 27 جاسقا دەيىنگى 20 مىڭنان استام ەر ازامات تولىقتىراتىن بولادى، - دەدى گەنەرال-مايور.

ونىڭ اتاپ وتۋىنشە، قورعانىس مينيسترلىگى اسكەردە قۇقىقتىق ءتارتىپتىڭ ساقتالۋىنا، اسكەري قىزمەتشىلەردىڭ ءومىرى مەن دەنساۋلىعىن ساقتاۋعا باعىتتالعان شارالار جۇيەسىن جاسادى. ءاربىر ساربازدىڭ ءومىرى باقىلاۋدا بولادى. وعان «ساربازدار انالارى كوميتەتى» تارتىلدى.

- اسكەردە ساربازداردىڭ اتا- انالارىمەن جانە تۋىستارىمەن بەينەبايلانىسقا شىعۋىن قامتاماسىز ەتەتىن «وتباسىمەن بەينەقوڭىراۋ» سەرۆيسى بەلسەندى قولدانىلىپ جاتىر. «ARMIA.KZ» اقپاراتتىق سەرۆيسى جۇمىس ىستەپ تۇر. ول قارۋلى كۇشتەردى سيفرلاندىرۋ جانە ازاماتتارمەن «اشىق ۇكىمەت» قاعيداتى بويىنشا ءوزارا ارەكەت ەتۋدى جاقسارتۋ ءۇشىن جاسالدى، - دەدى ساكەن ءجۇسىپوۆ.

قورعانىس مينيسترلىگى ۇسىنعان مالىمەتكە سايكەس، اسكەر قاتارىنا 20833 ادام تارتىلادى. ونىڭ ىشىندە:

قارۋلى كۇشتەرگە - 10598 ادام؛
ۇلتتىق گۆاردياعا - 7054 ادام؛
ۇ ق ك شەكارا قىزمەتىنە - 2500 ادام؛
توتەنشە جاعدايلار مينيسترلىگىنە - 391 ادام؛
مەملەكەتتىك كۇزەت قىزمەتىنە - 290 ادام.

بۇعان دەيىن مەملەكەت باسشىسى قاسىم-جومارت توقايەۆ قازاقستان رەسپۋبليكاسىنىڭ ازاماتتارىن 2025 -جىلدىڭ ناۋرىز- ماۋسىمىندا جانە قىركۇيەك- جەلتوقسانىندا مەرزىمدى اسكەري قىزمەتكە كەزەكتى شاقىرۋ تۋرالى تۋرالى جارلىققا قول قويعانىن جازعان ەدىك.

اۆتور

مارلان جيەمباي