اسكەردەن كەيىن ءبىلىم گرانتىن العاندار قانداي ماماندىقتاردى تاڭدادى
استانا. KAZINFORM - قازاقستاندا بەلگىلەنگەن مەرزىمدى اسكەري قىزمەتىن وتەگەن 1745 ازاماتقا ەلىمىزدىڭ جوعارى وقۋ ورىندارىندا ءبىلىم الۋ ءۇشىن مەملەكەتتىك ءبىلىم بەرۋ گرانتتارى بەرىلدى، دەپ حابارلايدى قورعانىس مينيسترلىگىنىڭ باسپا ءسوز قىزمەتى.
ەڭ كوپ سۇرانىسقا يە اقپاراتتىق تەحنولوگيالار بولىپ وتىر. بۇل ماماندىقتى 234 ادام، ياعني گرانت يەگەرلەرىنىڭ 13,4 پايىزى تاڭداعان. ەكىنشى ورىندا - ورمان شارۋاشىلىعى. 136 ادام (7,8 پايىز) بولاشاق ماماندىعىن تابيعاتتى قورعاۋ سالاسىنا ارناعىسى كەلەدى. ءۇشىنشى ورىندا 134 اداممەن (7,7 پايىز) كوممۋنيكاتسيالار جانە كوممۋنيكاتسيالىق تەحنولوگيالار ماماندىعى تۇر. ال تاعى 119 ادام (6,8 پايىز) اقپاراتتىق قاۋىپسىزدىك باعىتىن تاڭداعان.
جوعارى وقۋ ورىندارى اراسىندا قازاق ۇلتتىق اگرارلىق زەرتتەۋ ۋنيۆەرسيتەتى كوش باستاپ تۇر. مۇندا 156 گرانت يەگەرى (8,9 پايىز) ءبىلىم الۋعا نيەت بىلدىرگەن. ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىن 144 ادام (8,3 پايىز) تاڭداعان. ءۇشىنشى ورىندى ءال-فارابي اتىنداعى قازاق ۇلتتىق ۋنيۆەرسيتەتى مەن م. اۋەزوۆ اتىنداعى وڭتۇستىك قازاقستان ۋنيۆەرسيتەتى ءبولىستى. ولاردىڭ ءارقايسىسىنا 134 ادامنان (7,7 پايىز) تۇسكەن.
مەملەكەتتىك ءبىلىم بەرۋ گرانتى يەگەرلەرىنىڭ ءبىرى - ءاليحان جامبىلوۆ. ول اقپاراتتىق قاۋىپسىزدىك ماماندىعىن تاڭداعان.
- اقپاراتتىق قاۋىپسىزدىك ماماندىعىن سانالى تۇردە تاڭدادىم. بۇگىندە سيفرلىق تەحنولوگيالار بارلىق سالادا قولدانىلادى. سوندىقتان اقپاراتتى قورعاۋ سالاسى مامانىنا سۇرانىس جوعارى. اسكەري قىزمەتتى وتەگەننەن كەيىن گرانت الۋ مۇمكىندىگى مەن ءۇشىن ۇلكەن ىنتالاندىرۋ بولدى. ەندىگى مىندەتىم - ساپالى ءبىلىم الىپ، بىلىكتى مامان اتانۋ، - دەدى ءاليحان جامبىلوۆ.
اسكەري قىزمەتشىلەردى ىرىكتەۋ «سروچنيكي 2.0» سيفرلىق جوباسى اياسىندا جۇرگىزىلەدى. مەرزىمدى قىزمەت بارىسىندا اسكەري قىزمەتشىنىڭ سيفرلىق رەيتينگى قالىپتاستىرىلادى. وندا جاۋىنگەرلىك دايارلىق ناتيجەلەرى، اسكەري ءتارتىبى جانە باسقا دا كورسەتكىشتەرى ەسكەرىلەدى. رەيتينگ قورىتىندىسى بويىنشا اقپاراتتىق جۇيە ءبىلىم بەرۋ گرانتتارىن اۆتوماتتى تۇردە بولەدى. بۇل ىرىكتەۋ ۇدەرىسىنىڭ اشىقتىعىن قامتاماسىز ەتىپ، ادامي فاكتوردىڭ ىقپالىن بولدىرمايدى.
2024 -جىلى مەرزىمدى اسكەري قىزمەتشىلەرگە شاكىرتاقى تولەنەتىن مەملەكەتتىك ءبىلىم بەرۋ گرانتتارىن الۋ جانە جاتاقحانادان ورىن بەرۋدە باسىم قۇقىققا يە بولۋ مۇمكىندىگى زاڭنامالىق تۇرعىدا بەكىتىلدى. سونىمەن قاتار بەلگىلەنگەن مەرزىمدى اسكەري قىزمەتىن وتەگەن ازاماتتار تىكەلەي اسكەري قىزمەت بارىسىندا وتكەن ىرىكتەۋ ناتيجەلەرى بويىنشا جوعارى اسكەري وقۋ ورىندارىنا ءتۇسۋ مۇمكىندىگىنە يە.
ءبىلىم الۋعا بەرىلەتىن جەڭىلدىكتەر مەرزىمدى اسكەري قىزمەتتىڭ بەدەلىن ارتتىرۋعا باعىتتالعان شارالاردىڭ ءبىرى سانالادى. ولار جاستاردىڭ زاپاسقا شىققاننان كەيىن ءبىلىم الىپ، كاسىبي تۇرعىدان دامۋىنا قوسىمشا مۇمكىندىك بەرەدى.
