پاسكال سىيلىعى: ج ي كومەگىمەن جازىلعان كوركەم شىعارمالارعا سىيلىق بەرەتىن ۇيىم قۇرىلدى

قىركۇيەكتەن بەرى فرانسۋز ادەبيەت الەمىندە كانادالىق- گايتيلىك جازۋشى تەليسون ورەليەننىڭ C’était ça ou mourir رومانىنا قاتىستى داۋ تالقىلانىپ جاتىر. جازۋشىنىڭ شىعارمانى جازۋ كەزىندە جاساندى ينتەللەكتىنى كەڭىنەن پايدالانعانى جونىندە ايىپتاۋلار ايتىلعان. كەشە ونىڭ كاناداداعى باسپاسى كىتاپتا ج ي قولدانىلعانىن راستادى جانە اۆتورمەن جۇمىسىن توقتاتتى. ورەليەن بولسا، ايىپتاۋلاردى جوققا شىعارىپ، تاريحي زەرتتەۋ ءۇشىن سىرتقى دەرەككوزدەر مەن ءتۇرلى قۇرالداردى پايدالانعانىن ايتتى.

«كىتاپتى ءوزىم جازعانىمدى ايتتىم. ونى ج ي جازعان جوق قوي»، - دەدى ول Libération باسىلىمىنا بەرگەن سۇحباتىندا. جازۋشىنىڭ ايتۋىنشا، ول ج ي-دى ءتىل اۋدارۋعا ارنالعان قۇرالدار سەكىلدى پايدالانعان جانە مۇنداي داۋدىڭ تۋىندايتىنىن كۇتپەگەن.

ال جاڭا Prix Pascal سىيلىعى ج ي قولدانۋعا اشىق تۇردە مۇمكىندىك بەرەدى. ۇيىمداستىرۋشىلاردىڭ ايتۋىنشا، بايقاۋ تەحنولوگيانىڭ ءوزىن ەمەس، ادام مەن ماشينانىڭ بىرلەسكەن شىعارماشىلىعىنان تۋعان ادەبيەتتى باعالاۋدى كوزدەيدى.

«جاساندى ينتەللەكت قازىردىڭ وزىندە جازۋ شەبەرحانالارىندا، قولجازبالاردا جانە كىتاپ دۇكەندەرىندە كەزدەسەدى، ءبىراق ونى كوپ جاعدايدا ەشكىم بايقامايدى. Pascal سىيلىعى ماڭىزدى سۇراقتى اشىق قويادى: اۆتور مەن ماشينا بىرلەسىپ جۇمىس ىستەگەندەگى ادەبي شىعارما قانداي؟» - دەلىنگەن سىيلىقتىڭ رەسمي سايتىندا.

بايقاۋعا قاتىسۋشىلار شىعارمانىڭ قولجازباسىن جانە ونى جازۋ كەزىندە قانداي الگوريتمدەر مەن ج ي قۇرالدارى قولدانىلعانىن تۇسىندىرەتىن تەحنيكالىق قۇجات ۇسىنۋى كەرەك. ChatGPT ،Claude، Gemini جانە LLaMA سياقتى ءىرى تىلدىك مودەلدەردى پايدالانۋعا رۇقسات ەتىلەدى.

«باسقالار ج ي-دى ءبىر-بىرىنە قايشى كەلەتىن انىقتاۋ قۇرالدارىمەن ىزدەپ جاتقاندا، Prix Pascal اۆتورلاردى ونى قولدانعانىن اشىق كورسەتۋگە شاقىرادى. مۇندا ۇگىت تە، سوتتاسۋ دا جوق - اشىقتىق پىكىرتالاس پەن ۇجىمدىق زياتكەرلىكتىڭ نەگىزى بولۋى كەرەك»، - دەيدى ۇيىمداستىرۋشىلار.

سىيلىققا ازاماتتىعى مەن تۇرعىلىقتى جەرىنە قاراماستان، فرانسۋز تىلىندە جازاتىن كەز كەلگەن ادام قاتىسا الادى. باسپا كەلىسىمشارتىنىڭ بولۋى مىندەتتى ەمەس. بايقاۋدىڭ نەگىزىن تەحنولوگيا سالاسىنداعى كاسىپكەرلەر فيليپپ رودريگەس، البين سەرۆيان جانە جيل مەنترە قالاعان. قازىلار القاسى جاريالانباعان، ءبىراق پايدالى وي ۇسىناتىن نەمەسە وقىرماندى تولعاندىراتىن شىعارما ىزدەيدى.

ءوتىنىم قابىلداۋ باستالدى. بەس بەدەلدى تۇلعادان تۇراتىن قازىلار القاسىنىڭ قۇرامى ايدىڭ سوڭىندا جاريالانباق. 2026 -جىلعى سىيلىق يەسى جەلتوقساننىڭ ورتاسىندا بەلگىلى بولادى. اقشالاي جۇلدە قاراستىرىلماعانىمەن، جەڭىمپازعا شىعارماسىن باسىپ شىعارۋعا قولداۋ كورسەتىلەدى.

فرانسيا زاڭناماسى ادەبي شىعارما جازۋدا ج ي قولدانۋعا ارنايى تىيىم سالمايدى ءارى ونى جەكە تارتىپپەن رەتتەمەيدى. سوندىقتان جاڭا سىيلىقتىڭ قۇرىلۋى زاڭدى. دەگەنمەن ونىڭ پايدا بولۋى جازۋشىلار مەن باسقا دا شىعارماشىلىق وكىلدەرى ج ي-دىڭ ىقپالىنا الاڭداپ، بۇل سالاعا قاتىستى ناقتى ەرەجەلەر مەن كەپىلدىكتەر ەنگىزۋدى تالاپ ەتىپ جاتقان ۋاقىتپەن تۇسپا-تۇس كەلدى.

سىيلىق فرانسۋز ماتەماتيگى ءارى فيلوسوفى بلەز پاسكالدىڭ قۇرمەتىنە اتالعان. ۇيىمداستىرۋشىلار ونىڭ مەحانيكالىق قۇرىلعىلاردىڭ دامۋىنا ۇلەس قوسقان جاڭاشىل ءارى ءسوز ونەرىن تەرەڭ مەڭگەرگەن ويشىل بولعانىن اتاپ وتەدى. سايتتا پاسكالدىڭ «ادامنىڭ وي-ءورىسى نەعۇرلىم كەڭ بولسا، سوعۇرلىم اينالاسىنان ەرەكشە ادامداردى كوپ كورەدى» دەگەن ءسوزى دە كەلتىرىلگەن.