ماسكەۋ 47 جىلدا العاش رەت اۋىر اتلەتيكادان الەم چەمپيوناتىن وتكىزەدى
استانا. قازاقپارات - 2030-جىلى اۋىر اتلەتيكادان الەم چەمپيوناتى ماسكەۋدە وتەدى. بۇل تۋرالى حالىقارالىق اۋىر اتلەتيكا فەدەراتسياسىنىڭ (IWF) باسپا ءسوز قىزمەتى مالىمدەدى.
IWF باس حاتشىسى حوسە كينونەستىڭ ايتۋىنشا، جارىستى وتكىزۋگە نيەتتى ەلدەردەن ءبىرقاتار لايىقتى ءوتىنىم تۇسكەن. ول الەم چەمپيوناتىن ۇيىمداستىرۋعا كوپتەگەن مەملەكەت قىزىعۋشىلىق تانىتىپ وتىرعانىن جانە اۋىر اتلەتيكانىڭ جاھاندىق دەڭگەيدە دامىپ كەلە جاتقانىن اتاپ ءوتتى.
رەسەي 2022-جىلدان بەرى العاش رەت وليمپيادالىق سپورت تۇرىنەن ءىرى حالىقارالىق جارىس وتكىزۋ قۇقىعىنا يە بولدى. ماسكەۋدە اۋىر اتلەتيكادان الەم چەمپيوناتى بۇعان دەيىن ءۇش رەت – 1975، 1980 جانە 1983-جىلدارى وتكەن.
IWF مالىمەتىنشە، 2028-جىلى جاس وسپىرىمدەر اراسىنداعى الەم چەمپيوناتى كوسوۆونىڭ پريشتينا قالاسىندا، ال جاستار اراسىنداعى الەم چەمپيوناتى ۆەنەسۋەلانىڭ كاراكاس قالاسىندا وتەدى. سونداي-اق 2029-جىلعى ەرەسەكتەر اراسىنداعى الەم چەمپيوناتى ءۇندىستاننىڭ احمەداباد قالاسىندا بولادى.
بۇعان دەيىن حالىقارالىق اۋىر اتلەتيكا فەدەراتسياسى (IWF) قىتايدىڭ نينبو قالاسىندا وتەتىن الەم چەمپيوناتىنا قاتىساتىن سپورتشىلاردىڭ الدىن الا ءتىزىمىن جاريالاعانىن حابارلاعان ەدىك.
