استانالىق ازامات Ashyq قوسىمشاسىنان باس تارتىپ، اۋەجاي قىزمەتكەرىنە قول كوتەردى
مۇنى اۋەجايدىڭ باسپا ءسوز حاتشىسى انۋار شالەكەنوۆ قازاقپارات تىلشىسىنە راستادى. ونىڭ سوزىنە قاراعاندا، وقيعا 19-مامىردا بولعان. بەلگىسىز تۇرعىن اۋەجاي عيماراتىنا Ashyq جۇيەسى ارقىلى كىرۋدەن باس تارتىپ، جانجال شىعارعان.
«ول Ashyq جۇيەسىن اينالىپ وتۋگە تىرىسقان كەزدە اۆياتسيالىق قاۋىپسىزدىك قىزمەتكەرى توقتاتقان. نىسانعا ماسكاسىز كىرگەن ەر ادام قىزمەتكەرگە دەنە جاراقاتىن سالدى. اۋەجاي قىزمەتكەرلەرى پوليتسيا بولىمىنە جۇگىندى. كوپ ۇزاماي ءتارتىپ بۇزۋشى تابىلدى»، - دەيدى انۋار شالەكەنوۆ. ەندى استانالىق تۇرعىن وسى ارەكەتى ءۇشىن اكىمشىلىك جاۋاپقا تارتىلۋى مۇمكىن. «تۇسىنبەۋشىلىك پەن كەلەڭسىز جايلاردى بولدىرماۋ ءۇشىن قوسىمشانى الدىن الا جۇكتەپ الىپ، ءوز مارتەبەڭىزدى نۇرسۇلتان نازاربايەۆ اۋەجايىنىڭ سايتىنداعى QR- كود ارقىلى ءبىلۋىڭىزدى سۇرايمىز. « قىزىل» نەمەسە «سارى» ءتۇستى مارتەبەسى بار كەلۋشىلەر اۋەجايعا كىرگىزىلمەيتىنىن تاعى دا ەسكە سالامىن»، - دەدى اۋەجايدىڭ باسپا ءسوز حاتشىسى.
بۇعان دەيىن حابارلاعانىمىزداي، Ashyq جۇيەسى ارقىلى ەلوردا اۋەجايىندا 50 گە جۋىق جولاۋشى تەرمينالدان كەرى قايتارىلعان بولاتىن.
اۆتور: ەسىمجان ناقتىباي
