اسحات ايماعامبەتوۆ اقىلى تۇراق تۋرالى: استانا اكىمدىگى كەلىسىمشارتتىڭ تۇتقىنى بولىپ وتىر

استانا. KAZINFORM - ءماجىلىس دەپۋتاتى اسحات ايماعامبەتوۆ استاناداعى اقىلى تۇراقتاردىڭ ماسەلەسىن رەتتەۋدىڭ جولىن ايتتى.

بۇعان دەيىن دەپۋتات ەلورداداعى اقىلى تۇراقتار ماسەلەسىن كوتەرىپ، اكىمدىككە الەۋمەتتىك جەلى ارقىلى ساۋال جولداعان بولاتىن.

«ءبىز كەشە سۇراق قويىپ، جاۋابىن الدىق. بۇل مەملەكەتتىك- جەكە مەنشىك ارىپتەستىگى اياسىنداعى كەلىسىمشارت 5-6 جىل بۇرىن بەكىتىلگەن ەكەن. اكىمدىك قازىر سول كەلىسىمشارتتىڭ مىندەتتەرىن ورىنداۋعا ءماجبۇر. سوندىقتان ءتيىستى تۇزەتۋ ازىرلەپ جاتىرمىز. ويتكەنى اكىمدىك بۇرىن بەكىتىلىپ كەتكەن كەلىسىمشارتتىڭ تۇتقىنى بولىپ وتىر. ول تۇزەتۋ اكىمدىككە كەلىسىمشارتتى قايتا قاراۋعا مۇمكىندىك بەرەدى. ءبىز زاڭ شىعارۋشىلار رەتىندە ونداي مۇمكىندىك بەرۋىمىز كەرەك. بۇل تاجىريبە، اقىلى تۇراقتار ينستيتۋتى استانا، الماتى، شىمكەنتتە عانا ەمەس، باسقا وڭىرلەرگە دە تاراتىلادى دەپ ويلايمىن. سوندىقتان ءبىز زاڭعا وسى قۇقىقتىق قاتىناستاردىڭ ءبارىن رەتتەيتىن تۇزەتۋلەر ەنگىزۋ تۋرالى باستاما كوتەرەمىز. وزگە وڭىرلەردە اقىلى تۇراقتار پايدا بولعان جاعدايدا اقىسىز تۇراقتار قانداي ورىندا بولاتىنىن، الەۋمەتتىك ماڭىزدى ورىندار بەلگىلەنۋى كەرەك. ودان كەيىن تۇسكەن اقىنىڭ باسىم بولىگى بيۋدجەتكە ءتۇسۋ كەرەك»، - دەدى دەپۋتات.

اسحات ايماعامبەتوۆ 2-3-اپتانىڭ ىشىندە دەپۋتاتتار ناقتى باستاما كوتەرەتىنىن ايتادى.

«بۇل جەردە سارالانعان ءتاسىل كەرەك. پاريج، لوندون سياقتى قالالاردى قاراساق، سارالانعان تولەم ءتاسىلى قولدانىلادى. سۇرانىس جوعارى اۋدانداردا تۇراق اقىسى ايتارلىقتاي جوعارى بولادى. ال باسقا ورىنداردا ارزانىراق بولادى. الەۋمەتتىك توپتار تولەيتىن اقى دا تومەن بولادى. تۇراتىن ءۇيىڭىزدىڭ ماڭىنداعى تۇراق ءسىز ءۇشىن اقىلى بولماۋ كەرەك دەگەن سياقتى نورمالار كەرەك. ياعني، اقىلى تۇراق ماسەلەسىندە وركەنيەتتى تاسىلدەر بولۋى كەرەك»، - دەدى ول.