اڭسار نيەتقاليەۆ استانادا وتكەن تۋرنيردىڭ ابسوليۋتتى چەمپيونى اتاندى
استانا. KAZINFORM - استانا قالاسىندا «داۋلەت» تەننيس ورتالىعىندا 16 جاسقا دەيىنگىلەر اراسىندا Tennis Europe اياسىندا وتكەن جارىس مارەسىنە جەتتى.

قازاقستاندىق جاس تەننيسشىلەر باق سىناعان تۋرنيردە 15 جاستاعى اڭسار نيەتقاليەۆ ءابسوليۋتتى جەڭىمپاز اتاندى. ول جەكەلەي سىندا فينالدا جانتورە سانجار ۇلىن 6:3، 6:3 ەسەبىمەن ۇتتى.
سونداي-اق جۇپتىق سىندا دانيەل يۋرەكليمەن بىرگە ەشكىمدى شاق كەلتىرمەدى.
قىزدار اراسىندا سارا حاميتوۆا سوڭعى باسەكەدە تامينا ساكەننەن ايلاسىن اسىردى - 6:0، 6:0. جۇپتىق سىندا ياسمينا دۇيسەمبايەۆا - گۇلدەن ازامات قىزى ۇزدىك شىقتى.
تاعى ءبىر قازاقستاندىق ماليكا امىرعاليەۆا جاسوسپىرىمدەر اراسىندا يسپانيانىڭ ماناكورە قالاسىندا رافاەل نادال تەننيس اكادەمياسىندا وتكەن ITF J100 تۋرنيرىندە فينالعا دەيىن جەتتى.
ماليكا جۇپتىق سىندا قىتايلىق مين حۋ جوۋمەن بىرگە فينالدا ءۇش ساعاتقا سوزىلعان ماتچتا يسپانيالىق مارينا گاتەل - وڭتۇستىك كورەيالىق حا يۋن سونعا ەسە جىبەردى - 2:6، 7:6 (7:5)، 4:10.
ەسكە سالا كەتەيىك، بۇدان بۇرىن تەننيستەن اننا دانيلينانىڭ الەمدىك رەيتينگىدە 19- ورىنعا كوتەرىلگەنىن جازعان ەدىك.