اسپالى ارقان جولى: ۇلانباتىردا جاڭا قوعامدىق كولىك جۇيەسى بوي كوتەرەدى
استانا. KAZINFORM - موڭعوليانىڭ ۇلانباتىر قالاسىندا جاڭا كولىك جۇيەسى - اسپالى ارقان جول جوباسى جۇزەگە اسىرىلىپ جاتىر، دەپ حابارلايدى مونسامە.
اسپالى ارقان جولى 98 جولاۋشىلار كابيناسىنان تۇرادى جانە ەڭ قاربالاس ۋاقىتتا ساعاتىنا 2320 ادامدى تاسىمالداۋعا قاۋقارلى بولادى. قازىرگى تاڭدا جوبانىڭ %38 ى ورىندالعان.
ۇلانباتىر اكىمدىگىنىڭ مالىمەتىنشە، جوبا اياسىندا 19 تىرەك باعانا مەن ەكى ستانسيا سالىنادى. قازىرگى ۋاقىتتا ستانسيالارداعى قۇرىلىس جۇمىستارى جالعاسۋدا: ىرگەتاستى قۇيۋ %75 عا اياقتالعان، ال 19 تىرەكتىڭ التاۋى تولىق ورناتىلعان.
جالپى قۇرىلىس جۇمىستارىنىڭ %18 ى ورىندالدى. قۇرىلىس الاڭىندا 15 تەحنيكا جانە 88 قىزمەتكەر جۇمىس ىستەپ جاتىر. باس مەردىگەر - اسپالى جول سالاسىندا 100 جىلدان استام تاجىريبەسى بار، الەمگە ايگىلى فرانسۋزدىق POMA توبى. كومپانيا تەحنيكالىق باسقارۋعا، جوبانى ىسكە اسىرۋعا جانە كەڭەس بەرۋگە جاۋاپتى.
قۇرىلىس جۇمىستارىن «موننيس ينجينيرينگ» كومپانياسى جۇرگىزىپ كەلەدى. كولىككە قاجەتتى ماتەريالدار مەن جابدىقتار فرانسيادان جەتكىزىلۋدە. قازىرگى ۋاقىتتا جالپى جۇكتەردىڭ %69 ىن قۇرايتىن 103 كونتەينەر يمپورتتالىپ، تۇسىرىلگەن.
ۇلانباتىردى دامىتۋعا ارنالعان 24 مەگاجوبانىڭ ماقساتى - قوعامدىق كولىكتىڭ تۇرلەرىن كوبەيتىپ، ونىڭ قولجەتىمدىلىگىن ارتتىرۋ، سونىمەن قاتار جولداعى كەپتەلىستى جانە اۋانىڭ لاستانۋىن ازايتۋ.
بۇدان بۇرىن موڭعوليانىڭ حوۆد ايماعىنىڭ بيلىگى وبا اۋرۋىنىڭ كۇدىكتى جاعدايلارى تىركەلۋىنە بايلانىستى جاپپاي ءىس-شارالارعا ۋاقىتشا شەكتەۋ قويىپ، مەكتەپتەردى قاشىقتان وقىتۋ فورماتىنا كوشىردى.
