ناسا-نىڭ 4 عارىشكەرى «مارستاعى بازادا» 1 جىل تۇردى
استانا. KAZINFORM - ءتورت NASA عارىشكەرى حيۋستوندا مارستاعى جاعدايلارعا بارىنشا جاقىنداتىلعان، 3D پرينتەردە باسىپ شىعارىلعان ەكسپەريمەنتتىك مودۋلدە 378 كۇن تۇردى. ەكيپاج ميسسياسىن ءساتتى اياقتادى. بۇل تۋرالى Independent باسىلىمى جازدى.
ەكيپاج 2025 -جىلدىڭ 19-قازانىنان بەرى ليندون دجونسون اتىنداعى عارىش ورتالىعىنداعى 158 شارشى مەترلىك قۇرىلىمدا تۇرىپ كەلدى. ميسسيا كومانديرى روسس ەلدەر، زەرتتەۋشى عالىم مەتتيۋ مونتگومەري، بورتينجەنەر دجەيمس سپايسەر جانە ميسسيا دارىگەرى ەللەن ەلليس CHAPEA (Crew Health and Performance Exploration Analog) عىلىمي ەكسپەريمەنتىنە قاتىستى.
قاتىسۋشىلار مارس توپىراعىنا ۇقساس جاعدايدا وسىمدىكتەر ءوسىردى، رەسۋرسى شەكتەۋلى جاعدايلاردا تاپسىرمالاردى ورىندادى جانە پلانەتاارالىق ميسسيالارعا ءتان بايلانىس كىدىرىسىمەن NASA باسقارۋ ورتالىعىمەن بايلانىستا بولدى.
ميسسيانى اياقتاعاننان كەيىن ەلليس بۇل ەكسپەريمەنتتى ءبىر جىلعا سوزىلعان وتە قيىن تاجىريبە دەپ اتادى. ەكيپاج كومانديرى روسس ەلدەر مارسقا ادام باسقاراتىن ميسسيانىڭ جوعارى تاۋەكەلدەرىنە قاراماستان، عىلىمي زەرتتەۋلەردىڭ، تەحنولوگيالىق دامۋدىڭ جانە تىنىمسىز ەڭبەكتىڭ ارقاسىندا بۇل ماقساتقا قول جەتكىزۋگە بولاتىنىن اتاپ ءوتتى.
«جەرگە ورالعاننان» كەيىن عارىشكەرلەر ەكى اپتالىق مەديتسينالىق جانە عىلىمي باعالاۋعا قاتىسادى. NASA ماماندارى ۇزاق ۋاقىت بويى وقشاۋلانۋ مەن اۆتونومدى جۇمىس ىستەۋدىڭ ادامداردىڭ فيزيكالىق جانە پسيحولوگيالىق جاعدايىنا، ولاردىڭ ەڭبەك ونىمدىلىگىنە جانە جەرمەن بايلانىستى ساقتاۋ قابىلەتىنە قالاي اسەر ەتەتىنىن زەرتتەيدى.
NASA الداعى 2030 -جىلدارى مارسقا ادام جىبەرۋدى جوسپارلاپ وتىر. وعان دەيىن اگەنتتىك ايعا عارىشكەر باسقاراتىن عارىش كەمەلەرىن جىبەرۋ باعدارلاماسىن قايتا قولعا الماق. اتالعان باعدارلاما 1972 -جىلدان بەرى جۇرگىزىلمەگەن.
اياقتالعان ەكسپەريمەنت CHAPEA باعدارلاماسىنىڭ ەكىنشى ميسسياسى بولدى. بۇعان دەيىنگى ءبىرىنشى باعدارلاما كەزىندە دە ءتورت ادامنان تۇراتىن ەكيپاج 2023-2024 -جىلدارى 378 كۇن «مارس مودۋلىندە» وقشاۋلانعان.
