اسا قۇندى بىرەگەي ماتەريالدار العاش رەت عىلىمي اينالىمعا ەندى - ەرلان قارين
استانا. KAZINFORM - الاش قوزعالىسىنىڭ تاريحىنا قاتىستى ارحيۆ ماتەريالدارىنىڭ كوپتەن كۇتكەن جيناعى جارىق كوردى. بۇل تۋرالى مەملەكەتتىك كەڭەسشى ەرلان قارين الەۋمەتتىك جەلىدەگى پاراقشاسىنا جازدى.
- بۇل - «الاشوردا ءىسى. 1920-1940 -جىلدار. قۇجاتتار مەن ماتەريالدار» دەپ اتالاتىن 12 تومدىق ارحيۆ قۇجاتتارى. جاڭا باسىلىم - ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ جۇمىسى بارىسىندا جينالعان بىرەگەي ارحيۆ قۇجاتتارىنان تۇراتىن جيناق. بۇل جيناقتى دايىنداۋعا 30 دان استام تاريحشى، ءارحيۆشى جانە ارحەوگراف اتسالىستى. ولاردىڭ قاتارىندا ق ر پرەزيدەنتى ءارحيۆىنىڭ، شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قىزمەتكەرلەرى بار. جوبانىڭ عىلىم جەتەكشىسى - ق ر ۇ ع ا اكادەميگى، تاريح عىلىمدارىنىڭ دوكتورى مامبەت قويگەلديەۆ، - دەپ جازدى مەملەكەتتىك كەڭەسشى.
ەرلان ءقاريننىڭ ايتۋىنشا، باسىلىمعا پارتيالىق- مەملەكەتتىك قۇرىلىمداردا جانە ارناۋلى مەملەكەتتىك ارحيۆتەردە ارنايى ساقتالعان 3 مىڭنان استام ماتەريال ەنگەن.
- ونىڭ ىشىندە ءاليحان بوكەيحان، احمەت بايتۇرسىن ۇلى، ءمىرجاقىپ دۋلاتوۆ، حالەل دوسمۇحامەدوۆ جانە باسقا دا قايراتكەرلەر ءومىرىنىڭ بۇرىن بەيمالىم تۇستارىنان سىر شەرتەتىن قۇجاتتار بار. 2 مىڭ دانامەن جارىق كورگەن جيناق ەلىمىزدىڭ وقۋ ورىندارى مەن عىلىمي مەكەمەلەرىنە تاراتىلادى. وسىلايشا، قازاقستان تاريحىن ودان ءارى زەردەلەۋ جانە ەلدىڭ تاريحي جادىن ساقتاپ، نىعايتۋ تۇرعىسىنان وتە ماڭىزدى جانە اسا قۇندى بىرەگەي ماتەريالدار العاش رەت عىلىمي اينالىمعا ەنگىزىلدى. جالپى، 2020-2023 -جىلدارى جۇمىس ىستەگەن مەملەكەتتىك كوميسسيانىڭ قىزمەتىنە 425 عالىم، ونىڭ ىشىندە ايماقتاردان كەلگەن 260 زەرتتەۋشى جۇمىلدىرىلدى. ءۇش جىلدىڭ ىشىندە 60 مەملەكەتتىك جانە ۆەدومستۆولىق ارحيۆتەن 700 مىڭعا جۋىق ءىس جينالدى، 2.6 ميلليونعا جۋىق ماتەريال مەن قۇجاتتىڭ قۇپيالىعى الىنىپ تاستالدى، ساياسي- قۋعىن سۇرگىننىڭ قۇربانى بولعان 311 مىڭنان استام ادام اقتالدى، - دەپ حابارلادى ەرلان قارين.
ەسكە سالا كەتۋ كەرەك، بۇعان دەيىن ەرلان قارين مەملەكەت جازۋشىلار وداعىنىڭ جۇمىسىنا ەرەكشە ءمان بەرەتىنىن ايتقان بولاتىن.
