اسا ءىرى كولەمدە الاياقتىق جاساعان كۇدىكتى ۋكراينادان ەكستراديتسيالاندى
استانا. KAZINFORM - بۇگىن باس پروكۋراتۋرا مەن ينتەرپول قىزمەتكەرلەرى سىرتقى ىستەر مينيسترلىگىنىڭ كومەگىمەن ۋكراينادان اسا ءىرى كولەمدە الاياقتىق جاساعان كۇدىكتىنى ەكستراديتسيالادى.
ول 2017-2019 -جىلدار ارالىعىندا الماتىدا سالىنىپ جاتقان ۇيدەن پاتەر بەرەمىن دەگەن سىلتاۋمەن ازاماتتاردىڭ جالپى سوماسى 140 ميلليون تەڭگەدەن استام مۇلكىن الداپ العان.
قىلمىس جاساعاننان كەيىن كۇدىكتى قاشىپ كەتكەندىكتەن وعان حالىقارالىق ىزدەۋ جاريالاندى.
وتكەن جىلدىڭ قاراشا ايىندا كۇدىكتى ۋكراينا اۋماعىندا ۇستالعان.
قازاقستان باس پروكۋراتۋراسىنىڭ ءوتىنىشى بويىنشا ۋكراين تاراپى كۇدىكتىنى ەلىمىزگە ەكستراديتسيالاۋ جونىندە شەشىم قابىلدادى.
ايتا كەتەرى، بىلتىر ۋكراينانىڭ قىلمىسكەرلەردى ەكستراديتسيالاۋ ماسەلەلەرى بويىنشا قازاقستان- ۋكراينا ءوزارا ءىس- قيمىلىن رەتتەگەن مينسك كونۆەنتسياسىنان شىققانىنا قاراماستان اتالعان ادامدى ۇستاپ بەرۋ قازاقستان رەسپۋبليكاسى مەن ۋكراينا اراسىنداعى 2018 -جىلى قازاقستان باس پروكۋراتۋراسى جاساعان ەكستراديتسيالاۋ تۋرالى شارتتىڭ ارقاسىندا مۇمكىن بولدى.
سونىمەن قاتار، استانا مەن كيەۆ اراسىندا تىكەلەي اۋە قاتىناسى بولماعاندىقتان، ىزدەۋدە جۇرگەن ادامدى ۋكراينادان مولدوۆا مەن تۇركيا ارقىلى وتكىزۋگە تۋرا كەلدى، ول ءۇشىن باس پروكۋراتۋراعا وسى ەلدەردەن ادامداردى ءوز اۋماقتارى بويىنشا ترانزيتتىك تاسىمالداۋعا كەلىسىمىن الۋ قاجەت بولدى.
قازىر ول استانا قالاسىنداعى تەرگەۋ يزولياتورىنا قامالدى.
ايىپ تاعىلىپ وتىرعان قىلمىس جاساعانى ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
