ماس كۇيدە اۆتوبۋس جۇرگىزگەن جۇرگىزۋشى 7 جىلعا كۋالىگىنەن ايىرىلۋى مۇمكىن
قاراعاندى. KAZINFORM - قوعامدىق كولىك تىزگىنىندە وتىرعان جۇرگىزۋشىنىڭ الكوگولدىك ماس كۇيدە بولعانى مەديتسينالىق كۋالاندىرۋ كەزىندە راستالدى. پوليتسەيلەر ونى جاياۋ جۇرگىنشىگە جول بەرمەگەنى ءۇشىن توقتاتقان.
قاراعاندىدا پولتسەيلەر № 29-باعىت بويىنشا قاتىنايتىن Dong Feng اۆتوبۋسىنىڭ 41 جاستاعى جۇرگىزۋشىسىن توقتاتتى. ول نازاربايەۆ داڭعىلىنداعى باعدارشاممەن رەتتەلمەيتىن جاياۋ جۇرگىنشىلەر وتكەلىندە جول قوزعالىسى ەرەجەسىن بۇزىپ، جاياۋ جۇرگىنشىگە جول بەرمەگەن.
تەكسەرۋ بارىسىندا جۇرگىزۋشىدەن الكوگولدىك ماساڭدىق بەلگىلەرى بايقالعان. مەديتسينالىق كۋالاندىرۋ ونىڭ كولىكتى ماس كۇيدە باسقارعانىن راستادى.
پوليتسەيلەردىڭ انىقتاۋىنشا، جۇرگىزۋشى بۇعان دەيىن سوڭعى ايالدامادا جولاۋشىلاردى ءتۇسىرىپ ۇلگەرگەن. الايدا سودان كەيىن دە اۆتوبۋسپەن باعىت بويىمەن ءجۇرۋىن جالعاستىرعان.
وعان قاتىستى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 608-بابىنىڭ 1-بولىگى بويىنشا اكىمشىلىك حاتتاما تولتىرىلدى. ءىس ماتەريالدارى سوتقا جولداندى.
جۇرگىزۋشى 15 تاۋلىككە اكىمشىلىك قاماققا الىنىپ، جەتى جىل مەرزىمگە كولىك قۇرالىن باسقارۋ قۇقىعىنان ايىرىلۋى مۇمكىن.
قاراعاندى وبلىسىنىڭ پوليتسيا دەپارتامەنتى كولىكتى الكوگولدىك ماساڭ كۇيدە باسقارۋ جولاۋشىلاردىڭ، جاياۋ جۇرگىنشىلەردىڭ جانە جول قوزعالىسىنا قاتىساتىن وزگە دە ادامداردىڭ ءومىرى مەن دەنساۋلىعىنا تىكەلەي قاۋىپ توندىرەتىنىن ەسكە سالدى.
